Saýd Arabııasy aımaqtaǵy eń jomart elge aınalyp otyr
ASTANA. 27 qarasha. QazAqparat - Saýd Arabııasy damýshy elderge qarajat aýdarýda arab elderi arasynda birinshi orynǵa, al búkil álem boıynsha úshinshi orynǵa taban tiregen. Búkilálemdik banktiń málimetine qaraǵanda, aýdarylatyn qarajattyń mólsheri jyl sońynda 28,4 mlrd dollarǵa jetedi. Bul týraly Áziret Sultan meshitiniń resmı saıty muslim.kz jazady.
«Western Union» kompanııasynyń deregine súıensek, osy elde jumys isteıtin sheteldikter 4 jyldyń ishinde alystaǵy úılerine 112 mlrd dollar aýdarsa, onyń 25 paıyzyn Taıaý Shyǵys pen Soltústik Afrıka elderine jóneltken. Dúnıejúzilik banktiń zertteýi kórsetkendeı, 2000-2010 jyldar aralyǵynda sheteldik jumysshylar Saýd Arabııasynan 194 mlrd dollar áketken, al ústimizdegi jyldyń 10 aıy ishinde bul kórsetkish 26,6 mlrd dollarǵa jetken. Qazirgi ýaqytta (2000-2010 j.) bul kórsetkish 182 paıyzǵa artqanyn aıta ketý kerek. Saýd Arabııasynda jumys isteıtin sheteldikterdiń sany 8 mln adamdy quraıdy, onyń 6 mıllıony jeke sektorda eńbek etedi.
Sheteldik jumysshylardyń aýdarǵan qarajaty jeke sektordyń aqsha aınalymynyń 18 paıyzyn qurap otyr. Banktiń esepteýinshe, álemdik deńgeıde aýdarylatyn qarajattyń mólsheri 2012 jyly 406 mlrd dollarǵa jetedi, bul kórsetkish ótken jylmen salystyrǵanda 6,5 paıyzǵa óskenin kórsetedi. Jyl ótken saıyn bul kórsetkish kem degende 10 paıyzǵa artyp keledi, 2015 jyly 534 mlrd dollarǵa jetedi.
