Saýd Arabııasy altyn óndirýdi eki esege ulǵaıtpaq

ASTANA. QazAqparat - Saýd Arabııasyndaǵy Saudi Arabian Mining Co iri altyn óndirýshi kompanııasy el ekonomıkasynyń munaıǵa táýeldiligin báseńsitý maqsatynda altyn óndirýdi 2020 jylǵa qaraı eki eseden astam kólemge arttyrmaq.

Sonymen qatar, kompanııa alıýmınıı, amıak sııaqty resýrstardyń da kólemin arttyrýdy josparlap otyr.

Bloomberg agenttiginiń habarlaýynsha, altyn óndirý kólemi 200 myń ýntsııadan 500 myń ýntsııaǵa deıin jetkizilýi kerek. Al, alıýmınıı 760 myńnan 1 mln tonnaǵa deıin artady.

Óziniń ekonomıkalyq baǵdarlamasyna sáıkes, Saýd Arabııasy ken óndirýdi kólemin kóbeıtip, 2030 jylǵa deıin munaı-gazdan bólek salalardaǵy jumys oryndarynyń sanyn eseleýge múddeli, dep jazady Gazeta.

Osyǵan deıin, Irannyń munaı óndirý kólemin kemitý jónindegi bastamaǵa qoldaý kórsetýden bas tartýyna baılanysty Saýd Arabııasy da munaı óndirýdi arttyratyny aıtylǵan bolatyn.