Saýd Arabııasy AQSh prezıdentiniń áıeli turǵan úıdi asa qymbat baǵaǵa satyp aldy
ASTANA. QazAqparat - Vırdjınııa shtatynyń soltústiginde AQSh-tyń 35-shi prezıdenti Djon Kennedıdiń áıeli Jaklın Kennedı turǵan jekejaı Saýd Arabııasynyń úkimetine 43 mln dollarǵa satyldy.
Bul týraly sársenbide Wall Street Journal gazeti jazdy.
Atalǵan nysan Amerıka astanasy aımaǵy jáne onyń mańyndaǵy qalalar tarıhyndaǵy eń qymbat turǵyn ǵımaratqa aınalyp otyr.
Saýd Arabııasy ókiliniń aıtýynsha, «Merrıvýd» jekejaıy AQSh-qa kelgen resmı delegatsııalardyń ornalasýy úshin qajet.
Buǵan deıin jekejaı America Online kompanııasynyń negizin qalaýshylardyń biri Stıv Keıske tıesili edi. Ol úıdi 2005 jyly 24,5 mln dollarǵa satyp alyp, byltyr 49,5 mln dollarǵa satatynyn málimdegen.
Jekejaı Potomak ózeniniń jaǵasynda ornalasqan, jalpy aýmaǵy 2,3 gektardy alyp jatyr. Sáýletti úıdiń jalpy aýdany - 2,137 myń sharshy metr. Onda tennıs korty, basseın, sportzal, tórt avtomobıl sııatyn garaj, t.b. bar.
Foto: wsj.com
