Saýd Arabııasynyń taq murageri qan tapsyrý naýqanyna qatysty

ASTANA. KAZINFORM — Muhammed ben Salmannyń bul áreketi erikti qan tapsyrýdy qoldaý ári qoǵamnyń gýmanıtarlyq bastamalarǵa qatysýyna úlgi boldy, dep habarlaıdy Kazinform tilshisi.

Saýd Arabııasynyń taq murageri jáne premer-mınıstri Muhammed ben Salman bın Abdýlazız Ál Saýd ózi bastaǵan jyl saıynǵy aktsııasy aıasynda qan tapsyrdy, dep habarlaıdy Saudi Press Agency.

Aktsııa 21 tamyzda Neom qalasynda ótti jáne basshylyqtyń yntymaqtastyq pen ózara kómek mádenıetin damytý jónindegi kúsh-jigeriniń jalǵasy boldy.

Bastama qoǵamnyń barlyq toptaryn erikti baǵdarlamalarǵa qatysýǵa yntalandyrýǵa baǵyttalǵan.

Uıymdastyrýshylardyń aıtýynsha, bul naýqannyń maqsaty – «Saýd Arabııasy – 2030» ulttyq strategııasynda kózdelgen «joǵary deńgeıdegi ál-aýqatqa ıe ómirsheń qoǵam» qalyptastyrý mindetterine sáıkes, 100 paıyz erikti donorlyqqa negizdelgen júıeni qurý.

Bul naýqan Saýd Arabııasy basshylyǵynyń sońǵy jyldardaǵy birqatar gýmanıtarlyq qadamynyń zańdy jalǵasy, dep atap ótti SPA. Olarǵa COVID-19-ǵa qarsy vaktsınatsııa, sondaı-aq Eki qasıetti meshittiń qamqorshysy men taq murageriniń ulttyq organ donorlyǵy baǵdarlamasyna tirkelýi kiredi.

Osy jolǵy naýqanda azamattardy donorlyqtyń densaýlyq saqtaý júıesi úshin mańyzdylyǵy týraly aqparattandyrýǵa erekshe kóńil bólindi. Árbir donorlyq emdelýge muqtaj naýqastar qan, plazma nemese trombotsıttermen qamtamasyz etiledi.

2024 jyly koroldikte 800 myńnan astam adam donor boldy.

Budan buryn Saýd Arabııasynyń «Uıqydaǵy hanzadasy» atanyp ketken hanzada Ál-Valıd ıbn Haled ıbn Talal Ál Saýd 20 jyldyq komadan keıin ómirden ozǵanyn jazǵanbyz.