Saýd Arabııasynyń taq murageri qan donorlyǵyna arnalǵan ulttyq naýqandy bastady
ASTANA. KAZINFORM — Saýd Arabııasynyń taq murageri ári premer-mınıstri Muhammed ben Salman ben Abdýlazız Ál Saýd qan tapsyryp, 2026 jylǵa arnalǵan jyl saıynǵy ulttyq qan donorlyǵy naýqanyn bastady, dep habarlaıdy Saudi Press Agency.
Taq murageri qan tapsyrý arqyly erikti donorlyqtyń jáne áleýmettik jaýapkershiliktiń mańyzyn atap ótip, qaıyrymdylyq pen volonterlik mádenıetin damytýǵa baǵyttalǵan ulttyq bastamalardy qoldady.
Naýqan halyq arasynda turaqty túrde erikti qan tapsyrýdyń mańyzy týraly aqparattandyrýdy arttyrýdy, azamattardyń donorlyqqa qatysýyn keńeıtýdi jáne Koroldiktiń medıtsınalyq mekemelerinde qan men onyń komponentteriniń turaqty qoryn qamtamasyz etýdi kózdeıdi.
Donor qany shuǵyl medıtsınalyq kómekke muqtaj naýqastarǵa, sondaı-aq onkologııalyq jáne gematologııalyq aýrýlardan em alyp jatqan jáne jaǵdaıy aýyr adamdarǵa qajet.
SPA málimetinshe, 2025 jyly erikti donorlar sanyn arttyrý jáne ulttyq qan qoryn tolyqtyrý maqsatynda júrgizilgen jumystar aıasynda 900 myńnan astam adam qan tapsyrǵan.
Qan donorlyǵyna arnalǵan jyl saıynǵy ulttyq naýqandy taq murageri alǵash ret 2025 jyly bastaǵan. Naýqan aıasynda donorlar sany tórt ese artyp, 65 myńnan asty. Bul Koroldik qan bankteri tarıhyndaǵy eń joǵary kórsetkish boldy. Erikti donorlardyń úlesi 100 paıyzǵa jetse, qatysýshylardyń 85 paıyzdan astamy alǵash ret qan tapsyrǵan.
Naýqan nátıjesinde donorlyq qan 63 myńnan astam naýqasqa berildi. Sonymen qatar shamamen 10 myń adam trombotsıt, taǵy 10 myńǵa jýyq adam qan plazmasyn aldy.
2026 jylǵy naýqan erikti donorlyqty odan ári damytýǵa jáne Saýd Arabııasynyń densaýlyq saqtaý júıesin qan men onyń komponentteriniń qaýipsiz ári turaqty qoryn qamtamasyz etý isinde qoldaýǵa baǵyttalǵan.
Buǵan deıin bir donor jylyna qansha ret qan tapsyra alatyny týraly jazǵan bolatynbyz.
