Saýd Arabııasynyń taq murageri AQSh Memlekettik hatshysyn ózin kútýge májbúr etti

Izraılmen qarym-qatynasty qalpyna keltirý jónindegi kelissózder toqtatylǵannan keıin Saýd Arabııasy AQSh-ty taǵy eleýsiz qaldyrdy. Kazinform agenttigi bul týraly Hindustan Times basylymyna silteme jasap habarlaıdy.

Washington Post gazetiniń habarlaýynsha, Er-Rııadta Saýd Arabııasynyń taq murageri Muhammed ben Salman AQSh memlekettik hatshysy Entonı Blınkendi kezdesý úshin birneshe saǵat kúttirdi.

Kezdesý keshke ótýi tıis edi, biraq Saýd Arabııasynyń taq murageri oǵan kelesi kúni tańerteń ǵana keldi. Bul 7 qazanda HAMAS-tyń shabýylynan keıin Izraıl men Gaza sektory arasyndaǵy shıelenistiń ýshyǵýy aıasynda bolyp otyr.

Hindustan Times basylymy jarııalaǵan vıdeoda taq murageri hanzada Salmannyń jazyqsyz jandardyń ómirin qıǵan qaqtyǵystardy jáne Gazany qorshaýdy toqtatý qajettigin atap kórsetkeni aıtylǵan. Sondaı-aq hanzada qaqtyǵystyń qazirgi ýshyǵýyn toqtatýǵa shaqyrdy.

Basylymnyń atap ótýinshe, Saýd Arabııasynyń HAMAS sodyrlaryna qatysty ustanymy AQSh ustanymyna tolyǵymen qarama-qaıshy. AQSh qazan aıynyń basyndaǵy jappaı shabýyldan keıin HAMAS-ty joıý úshin Izraıldi qoldady.