Saýd Arabııasynyń Suńqarlar klýby Qazaqstanda sırek kezdesetin qustardy tabıǵatqa qaıtardy
ASTANA. KAZINFORM – Saýd Arabııasynyń Suńqarlar klýby Qazaqstannyń «Altyn Emel» memlekettik ulttyq tabıǵı parkinde ıtelgilerdi tabıǵı ortasyna qaıtarý is-sharasyn ótkizdi. «Haddad» halyqaralyq baǵdarlamasy aıasynda júzege asqan bul bastama joıylyp bara jatqan suńqar tuqymdas qustardy óz mekenine qaıta ornalastyrýdy jáne olardyń tabıǵı ósim deńgeıin arttyrýdy kózdeıdi, dep habarlaıdy UNA.
Mamandardyń aıtýynsha, «Altyn Emel» ulttyq parki kezdeısoq tańdalǵan joq. Bul aımaq ıtelgilerdiń uıa salý kezeńine óte qolaıly, ashyq landshafty jáne qorek qorlardyń moldyǵymen erekshelenedi.
Іs-shara barysynda Saýd Arabııasy Suńqarlar klýby tóraǵasynyń orynbasary Ahmed ál-Hababı bul jobanyń ekologııalyq tepe-teńdikti saqtaýdaǵy mańyzyna toqtaldy.
— Búginde ıtelgiler joıylyp ketý qaýpi bar jabaıy tirshilik ıeleriniń qataryna jatady. Osyǵan baılanysty Saýd Arabııasynyń Suńqarlar klýby «Haddad» baǵdarlamasyn iske qosty. Bizdiń maqsatymyz — suńqarlardyń tabıǵattaǵy turaqtylyǵyn qoldaý. Baǵdarlamanyń ishki baǵyty aıasynda biz sheteldik seriktes memleketter aýmaǵynda ıtelgi men lashyn sanyn kóbeıtemiz, al halyqaralyq baǵytta Qazaqstan sııaqty elderde ıtelgi men sapsandy óz tabıǵı mekenine qaıta jersindiremiz, — deıdi Suńqarlar klýbynyń tóraǵasy.
Qazaqstandyq tarap bul bastamany joǵary baǵalap, eki el arasyndaǵy ekologııalyq yntymaqtastyqtyń mańyzdy qadamy ekenin atap ótti. Qanat Bozymbaev Saýd Arabııasyna tabıǵatty qorǵaýǵa qosqan úlesi úshin alǵys aıtty.
— «Altyn Emel» qoryǵynyń aspanyna qaıtadan jan bitirip, ıtelgilerdi ushyrǵandaryńyz úshin alǵysymyz sheksiz. Bul — sırek kezdesetin qustardy joıylyp ketýden saqtap qalýǵa baǵyttalǵan jomarttyq pen qamqorlyqtyń belgisi. Bul qadam keleshek urpaq úshin baǵa jetpes syı bolmaq, — deıdi ol.
Óz kezeginde «Altyn Emel» memlekettik ulttyq tabıǵı parkiniń basshysy Qýat Baıturbaev ta alǵysyn aıtyp, qustardyń aldaǵy ýaqytta turaqty baqylaýda bolatynyn jetkizdi.
— Biz Saýd Arabııasynyń Suńqarlar klýbymen birlese otyryp, bul qustardyń qaýipsizdigin qamtamasyz etemiz. Rezervat aýmaǵynda ıtelgilerdiń kóbeıý protsesin jiti qadaǵalap otyratyn bolamyz. Bul ıgi bastamanyń bizdiń qoryqta júzege asqanyn maqtan tutamyz, — deıdi Qýat Baıturbaev.
Aıta keteıik, saltanatty sharaǵa Saýd Arabııasynyń Qazaqstandaǵy elshiligi, Ulttyq jabaıy tabıǵatty damytý ortalyǵy, sondaı-aq Qazaqstan Respýblıkasy Ekologııa jáne tabıǵı resýrstar mınıstrligi men Zoologııa ınstıtýtynyń mamandary qatysty.
Buǵan deıin Túrkistan oblysynda suńqar tektes qustardyń sany azaıyp ketkenin habarlaǵan bolatynbyz.
