Saýd Arabııasynyń energetıkalyq kompanııasy Qazaqstannyń pılottyq jobalaryna qyzyǵýshylyq tanytty

ASTANA. KAZINFORM – Saýd Arabııasynyń astanasynda ótken Dúnıejúzilik ekonomıkalyq forýmda jergilikti «Acwa Power» kompanııasy Kaspııdiń Qazaqstanǵa tıesili aımaǵynda jańartylatyn energııa keshenin salý jobasyna qyzyǵýshylyq tanytty.

Bul týraly Energetıka mınıstrligi baspasóz qyzmeti málim etti.

«Energetıka mınıstri Almasadam Sátqalıev Er-Rııadtaǵy Dúnıejúzilik ekonomıkalyq forýmnyń arnaıy sessııasyna qatysyp, Saýd Arabııasy Koroldiginiń Energetıka mınıstri Abdýlazız ben Salman Abdýlazız ál Saýdpen, OPEK Bas hatshysy Haıtam Ál Gaıs (Haitham Al Ghais), ACWA Power Tóraǵasy Muhammed Abýnaıanmen (Mohammad Abdullah Abunayyan), sondaı-aq birqatar halyqaralyq munaı-gaz kompanııalarynyń ókilderimen kezdesti.

Forým aıasynda energetıka mınıstri «Chevron» kompanııasynyń halyqaralyq barlaý jáne óndirý jónindegi prezıdenti Kleı Neffpen kezdesti. 

Kezdesýde taraptar Teńiz ken ornyn ıgerýge, Qarashyǵanaq ken ornyn ıgerýge qatysty yntymaqtastyqtyń aǵymdaǵy máselelerin talqylady, Qarashyǵanaqta gaz óńdeý zaýytyn salý jobasyn iske asyrýdy jáne basqa da máselelerdi talqylady», - delingen mınıstrlik málimetinde.

Vedomstvo aqparaty boıynsha, arabııalyq «Acwa power» kompanııasynyń basshysy Qazaqstandaǵy tasqyn joıýǵa qoldaý kórsetýge daıyn ekenderin aıtqan.

«Acwa Power» kompanııasynyń tóraǵasy Muhammed Abýnaıan myrza Qazaqstannyń Kaspıı mańy aımaǵynda JEK jobasyn qurýǵa qyzyǵýshylyq bildirdi. 

Sonymen qatar, kompanııa Qazaqstandaǵy «jasyl sýtekti» damytý jobalaryna qyzyǵýshylyq tanytyp otyr. Osy baǵytta qazaqstandyq kompanııalarmen pılottyq jobalardy qarastyrýda.
Sondaı-aq, «Acwa power» basshysy Qazaqstandaǵy sý tasqynynyń saldaryn joıýǵa qoldaý kórsetýge ýáde berdi», - dep jazady mınıstrliktiń baspasóz qyzmeti.