Saýd Arabııasyndaǵy jaǵdaıǵa baılanysty Azııa kýbogi 2027 jyldyń sońyna shegerildi
ASTANA. KAZINFORM — Azııa fýtbol konfederatsııasy (AFC) kelesi jyldyń basynda Saýd Arabııasynda ótýi tıis bolǵan fýtboldan Azııa kýboginiń keıinge shegerilgenin málimdedi. Qurlyqtyq doda 2027 jyldyń jeltoqsan aıynda bastalady, dep jazady Kyodo.
Sońǵy aptalarda Saýd Arabııasyndaǵy jaǵdaıǵa baılanysty aımaqta birqatar sporttyq jarys pen halyqaralyq konferentsııa keıinge qaldyryldy nemese múlde toqtatyldy. Buǵan Iemendegi hýsıtter tobynyń Saýd Arabııasyna jasaǵan shabýyldary sebep bolǵan.
Azııa fýtbol konfederatsııasynyń habarlaýynsha, qurlyq birinshiligi bastapqyda kelesi jyldyń 7 qańtary men 5 aqpany aralyǵynda ótýi kerek edi. Endi týrnırdiń 2027 jyly 23 jeltoqsanda bastalyp, 2028 jyldyń 21 qańtarda aıaqtalýy josparlanǵan.
— Azııa kýbogin uıymdastyrý komıteti aımaqta bolyp jatqan oqıǵalarǵa baılanysty qalyptasqan aıryqsha jaǵdaıdy eskere otyryp, ulttyq quramalar arasyndaǵy basty týrnırdi keıinge shegerý týraly sheshimdi maquldady, — delingen konfederatsııa málimdemesinde.
Sondaı-aq habarlamada jarysty uıymdastyrýǵa qatysty eleýli logıstıkalyq jáne kólik máseleleri týyndaǵany aıtylǵan. Týrnırdiń jańa merzimi bekitý úshin Halyqaralyq fýtbol federatsııasyna (FIFA) usynylady.
Buǵan deıin Saýd Arabııasy bıyl qazan aıynyń sońǵy aptasynda ótýi tıis bolǵan iri ınvestıtsııalyq forýmdy 2027 jylǵa shegergen bolatyn.
Aıta keteıik, 2028 jylǵy ÝEFA Sýperkýbogi Astanada ótedi.