Saýd Arabııasyndaǵy úńgirden gepardtyń mýmııalanǵan qaldyǵy tabyldy

ASTANA. KAZINFORM – Saýd Arabııasy aýmaǵyndaǵy úńgirden gepardtardyń mýmııalanǵan qaldyqtary anyqtaldy.

Ǵalymdar eldiń soltústiginde, Arar qalasynyń mańynda júrgizilgen arheologııalyq jáne paleozoologııalyq zertteýler barysynda bes úńgirden jasy 130 jyldan 1 800 jylǵa deıingi aralyqty qamtıtyn jeti mýmııalanǵan gepardty, sondaı-aq taǵy 54 daraqtyń súıek qaldyqtaryn tapqan.

Zertteýshilerdiń aıtýynsha, iri jyrtqyshtardyń mýmııalary aıaq-qoldarynyń jaqsy saqtalýymen erekshelenedi jáne syrtqy kelbeti jaǵynan keýip qalǵan qabyqty eske salady.

Zertteý avtorlarynyń biri, Saýd Arabııasynyń Ulttyq jabaıy tabıǵat ortalyǵynyń qyzmetkeri Ahmed Býg bul oljany óńirde gepardtardyń bolǵanyn dáleldeıtin aıryqsha ári sırek kezdesetin derek dep atady.

Ǵalymdar alǵash ret mýmııalanǵan iri mysyqtarǵa genetıkalyq taldaý júrgizgen. Nátıjesinde olardyń DNQ-si qazirgi azııalyq jáne soltústik-batys afrıkalyq gepardtardyń genomyna jaqyn ekeni anyqtalǵan.

Mamandardyń atap ótýinshe, Reseı aýmaǵynan tabylǵan qylyshtisti jolbarystyń kúshigin qospaǵanda, iri sútqorektilerdiń mundaı deńgeıde jaqsy saqtalǵan qaldyqtary óte sırek kezdesedi.

Buryn Afrıkanyń edáýir bóliginde jáne Azııanyń jekelegen óńirlerinde keń taraǵan gepardtar búginde ózderiniń tarıhı meken etý aýmaǵynyń nebári 9 paıyzynda ǵana saqtalǵan.

Sonymen qatar zertteýshiler bul oljalar gepardtardy ǵana emes, joıylyp bara jatqan ózge de janýar túrlerin Arabııa túbegine qaıta qonystandyrý múmkindigine úmit uıalatady dep otyr.

Zertteý nátıjeleri Communications Earth & Environment ǵylymı jýrnalynda jarııalanǵan.

Aıta keteıik, Qytaı men Ózbekstan arheologteri Kýva qalashyǵy qabyrǵalarynyń qaldyqtaryn tapty.