Saýd Arabııasyndaǵy suńqar aýktsıonynda 8,8 mln dollardan astam qarjyǵa qus satyldy
ASTANA. KAZINFORM — Saýd Arabııasynda ótken Halyqaralyq suńqar ósirýshiler aýktsıonynda jalpy satylym kólemi 33 mln rıaldan (8,8 mln dollar) asty. Bul týraly eldiń Ulttyq Suńqar ortalyǵy málimdedi.
5–25 tamyz aralyǵynda Er-Rııadtyń soltústigindegi Malham eldi mekeninde ótken aýktsıonda 2 200-den astam suńqar satyldy. Sharaǵa álemniń 24 elinen 90-nan astam suńqar ósirý fermasy qatysty.
Aýktsıon barysynda ártúrli tuqymdaǵy jáne asyl tuqymdy jelilerden shyqqan suńqarlar usynyldy. Іs-sharaǵa Saýd Arabııasy men shetelden suńqar ósirýshiler, kásibı suńqarshylar, satyp alýshylar jáne osy ónerge qyzyǵýshylyq tanytqan adamdar jınaldy.
Bıylǵy aýktsıonda eń qymbat qus 1,3 mln rıalǵa satyldy. Bul — úsh shırek gır suńqary. Ol bıylǵy sharadaǵy eń joǵary baǵaǵa satylǵan qus atanyp qana qoımaı, aýktsıon tarıhyndaǵy eń qymbat suńqarlar arasynda ekinshi orynǵa shyqty.
Ulttyq Suńqar ortalyǵynyń bas dırektory Talal Ál-Shýmaısı aýktsıonnyń sońǵy alty jylda aıtarlyqtaı damyp, halyqaralyq deńgeıdegi mańyzdy alańǵa aınalǵanyn atap ótti.
Onyń aıtýynsha, shara jergilikti suńqar ósirýshilerge sheteldik áriptesteriniń tájirıbesimen tanysyp, halyqaralyq naryqtaǵy suranysty jaqsyraq túsinýge múmkindik berdi. Sonymen qatar aýktsıon saýda-sattyq júrgizýge jáne sala mamandary arasynda tájirıbe almasýǵa jaǵdaı jasady.
21 kúnge sozylǵan shara barysynda 12 aýktsıon keshi uıymdastyryldy. Budan bólek, kelýshilerge suńqarshylyqqa arnalǵan qural-jabdyqtar usynylyp, jastarǵa arnalǵan «Bolashaq suńqarshy» aımaǵy, tanymdyq baǵdarlamalar men semınarlar ótkizildi.
Aýktsıon aıasynda suńqar jarystaryndaǵy dopıng máselesine de nazar aýdaryldy. Ulttyq Suńqar ortalyǵy Saýd Arabııasynyń Dopıngke qarsy komıtetimen birlesip, jarystarda tyıym salynǵan zattar jáne dopıng-testileý tártibi boıynsha semınar ótkizdi.
Sondaı-aq Ulttyq jabaıy tabıǵat ortalyǵymen birge Saýd Arabııasynda suńqar ósirý ortalyqtaryn lıtsenzııalaý talaptary men rásimderine arnalǵan semınar uıymdastyryldy.
Ulttyq Suńqar ortalyǵy aldaǵy ýaqytta aýktsıondy odan ári damytyp, suńqar ósirýshiler men suńqarshylardy qoldaýdy jáne eldiń dástúrli suńqarshylyq mádenıetin saqtaýdy jalǵastyratynyn málimdedi.
Eske salaıyq, buǵan deıin Saýd Arabııasynda suńqar rekordtyq 472 500 dollarǵa satylǵanyn habarlaǵan edik.
