Saýd Arabııasyndaǵy munaı qubyrynyń toqtaýy álemdik munaı kóleminiń 4%-yna qaýip tóndirdi
ASTANA. KAZINFORM — Saýd Arabııasyndaǵy mańyzdy eksporttyq baǵyttardyń biriniń zaqymdanýy álemdik munaı naryǵyndaǵy ahýaldy ýshyqtyrýy múmkin, dep habarlaıdy Kazinform tilshisi.
Saýd Arabııasy «Shyǵys — Batys» munaı qubyryn jaqyn kúnderi iske qospasa, Qyzyl teńiz porttaryndaǵy munaı qory taýsylýdyń aldynda tur.
Reuters agenttigi saýdııalyq munaıdy satyp alýshylar men naryq qatysýshylarynyń málimetine súıene otyryp, bul jaǵdaı álemdik munaı kóleminiń shamamen 4%-ǵa qysqarýyna ákelýi múmkin ekenin habarlaıdy.
11 qyrkúıekte drondardyń soqqysynan keıin munaı qubyrynyń jumysy toqtatyldy.
Saýd Arabııasynyń Energetıka mınıstrligi qubyr arqyly munaı tasymaldaýdy toqtatý týraly sheshim qabyldanǵanyn málimdedi. Bul qadam Irak tarapynan Er-Rııad pen Medına provıntsııalaryndaǵy nysandarǵa jasalǵan dron shabýyldarynan keıin qaýipsizdik maqsatynda júzege asyrylǵan.
#بيان | إيقاف خط أنابيب شرق-غرب احترازياً إثر تعرضه لعدة استهدافات. https://t.co/F8UG9yZEXZ
— وزارة الطاقة (@MoEnergy_Saudi) September 11, 2026
Saýd Arabııasy bıligi zalal kólemi men munaı tasymalynyń qashan qalpyna keletinin ázirge naqtylaǵan joq. Reuters-ke pikir bildirgen derekkózderdiń biri jóndeýge 5-6 apta qajet ekenin aıtty. Al agenttiktiń taǵy bir derekkózi munaı qubyry jóndeý aıaqtalmaı turyp, ishinara iske qosylýy múmkin ekenin jetkizdi.
Uzyndyǵy shamamen 1200 shaqyrym bolatyn «Shyǵys — Batys» munaı qubyry Saýd Arabııasynyń shyǵysyndaǵy ken oryndaryn Qyzyl teńiz jaǵalaýyndaǵy ıAnbý portymen jalǵaıdy. Onyń táýligine shamamen 7 mln barrel munaı ótkizýge qaýqary bar. Sońǵy aılarda qubyr arqyly táýligine 4-5 mln barrel munaı tasymaldanyp, jetkizilimder Ormýz buǵazyn aınalyp ótetin baǵytqa qaıta buryldy. Bul — álemdik munaı jetkiziliminiń shamamen 4%-yna teń.
🇸🇦 Saudi Arabia could reportedly run out of exportable oil stocks within days if it fails to restart the drone-damaged East-West Pipeline to the Red Sea. 🛢 The disruption could remove up to 4% of global oil supply. 🛰 Vantor satellite imagery below shows one of the pipeline’s pumping stations completely destroyed in the attack.
— Egypt's Intel Observer (@EGYOSINT) September 14, 2026
Iranmen bolǵan soǵystyń saldarynan munaı jetkizilimi úzilgen kezde, bul qubyr tasymaldy turaqtandyrýda mańyzdy ról atqardy.
Reuters keltirgen úsh derekkózdiń málimetinshe, ıAnbý portyndaǵy munaı qory eksportty 5-7 kún boıy ustap turýǵa jetedi. Saýd Arabııasy budan bólek, Mysyrdyń Aın-Sohna men Sıdı-Kerır porttaryndaǵy qordy paıdalanyp, satyp alýshylarǵa birneshe kún munaı jetkize alady.
Saýd Arabııasynyń ıAnbý portyndaǵy munaı qoımalary shamamen 35 mln barrelge, Aın-Sohnadaǵylary 18 mln barrelge, al Sıdı-Kerırdegi qoımalar 20 mln barrelge eseptelgen. Alaıda qoımalar tolyq toltyrylmaǵan. Sondyqtan munaı qubyrynyń jumysy qalpyna kelmese, eksportqa qoljetimdi qor kóp uzamaı taýsylady.
Halyqaralyq energetıka agenttiginiń dereginshe, tamyzda Saýd Arabııasy munaıynyń eksporty 30 jyldan astam ýaqyttaǵy eń tómen kórsetkishke jetti. Buǵan Ormýz buǵazy men Qyzyl teńiz arqyly tasymaldyń azaıýy áser etti.
Saýd Arabııasy OPEK múshelerine munaı óndirisiniń kúrt tómendegenin málimdedi. Aqpanda táýligine 10,9 mln barrel munaı óndirilse, tamyzda bul kórsetkish 6,2 mln barrelge túsken.
Saýd Arabııasy munaı eksportynyń odan ári qysqarýy álemdik naryqtaǵy tapshylyqty kúsheıtýi múmkin. Otyn baǵasynyń ósýi ınflıatsııany jedeldetip, AQSh memlekettik oblıgatsııalary boıynsha tabystylyqty 2008 jylǵy qarjy daǵdarysynan bergi eń joǵary deńgeıge jetkizip otyr.
Buǵan deıin álemdik munaı baǵasy qaıtadan óskeni habarlanǵan bolatyn.
Aqzat Jıenalına
