Saýd Arabııasyndaǵy ańshylyq kórmesinde 5 myńnan astam ónim tanystyrylady
ASTANA. KAZINFORM — Saýd Arabııasynda ótetin halyqaralyq suńqarshylyq jáne ańshylyq kórmesinde qarý-jaraq, oq-dári jáne ańshylyqqa arnalǵan kerek-jaraqtardyń 5 myńnan astam túri tanystyrylady.
Saýd Arabııasynyń Suńqarlar ulttyq ortalyǵy uıymdastyratyn kórme 1-10 qazan aralyǵynda Er-Rııad qalasynyń soltústigindegi Malham aýdanynda ornalasqan Er-Rııad kórme jáne kongress ortalyǵynda ótedi.
Uıymdastyrýshylardyń málimetinshe, bıyl kórmege ańshylyq jáne sporttyq atys qarýyna mamandanǵan 11 kompanııa qatysady. Bul ótken jylǵy kórsetkishten 37,5 paıyzǵa kóp. Sonymen qatar pnevmatıkalyq qarý óndiretin 4 kompanııa jáne jabdyqtar men kerek-jaraq jetkizetin 9 kompanııa ónimderin usynady.
Kórme aıasynda ańshylyq pen sporttyq atysqa arnalǵan qarý-jaraq, oq-dári, pnevmatıkalyq qarý, qaýipsizdik quraldary, jeke qorǵanys jabdyqtary, qarýdy saqtaý, tazalaý jáne tehnıkalyq qyzmet kórsetýge arnalǵan quraldar kórsetiledi.
Sharaǵa álemniń jetekshi kompanııalaryna tıesili 181-den astam halyqaralyq brend qatysady. Uıymdastyrýshylar bul jergilikti jáne sheteldik kompanııalarǵa ańshylyq pen sporttyq atys áýesqoılarymen baılanys ornatyp, ónimderin tanystyrýǵa múmkindik beretinin atap ótti.
«Barshaǵa arnalǵan tájirıbe» taqyrybyndaǵy halyqaralyq kórme suńqarshylyq pen ańshylyqtan bólek, tabıǵat aıasyndaǵy demalys jáne shytyrman oqıǵaly týrızm baǵyttaryn da qamtıdy.
Kórme Saýd Arabııasy men shetelden kelgen sala mamandaryn, kompanııa ókilderin jáne áýesqoılardy bir alańǵa jınaıdy.
Buǵan deıin Soltústik Qazaqstan oblysynda 2026–2027 jylǵy ańshylyq maýsymynyń merzimderi jarııalandy.
