Saýd Arabııasynda Ýkraına-Amerıka kelissózderi ótip jatyr

ASTANA.KAZINFORM – Kelissóz barysynda Ýkraına AQSh-qa Reseımen atysty ishinara toqtatý josparyn usynady, dep habarlaıdy Kazinform agenttiginiń menshikti tilshisi.

Ýkraınanyń Syrtqy ister mınıstrligi seısenbi kúni AQSh pen Ýkraına delegatsııasy Djıdda qalasynda kezdesýdi bastaǵanyn habarlady. AQSh pen Ýkraınanyń joǵary laýazymdy tulǵalarynyń kezdesýi Saýd Arabııasynyń batysynda ornalasqan Djıdda qalasyndaǵy Ritz-Carlton qonaq úıinde ótedi. 

Sheneýnikter jýrnalısterdiń AQSh-tyń áskerı kómekti toqtatýy jáne Ýkraınanyń jartylaı atysty toqtatý týraly usynysy boıynsha suraqtaryna jaýap berýden bas tartty, dep habarlaıdy CNN.

Ústel basynda Saýd Arabııasynyń Ulttyq qaýipsizdik jónindegi keńesshisi ári Syrtqy ister mınıstri otyr. AQSh Memlekettik hatshysy Marko Rýbıo Ulttyq qaýipsizdik jónindegi keńesshi Maıkl Ýolttspen qatar otyr.

Ýkraına jaǵynan ústeldiń orta sheninde Zelenskııdiń bas kómekshisi Andreı Ermak, onyń janynda Syrtqy ister mınıstri Andreı Sıbıga jáne qorǵanys mınıstri Rústem Ýmerov bar.

Vladımır Zelenskıı ákimshiliginiń basshysy Andreı Ermaktyń aıtýynsha, Ýkraına AQSh sheneýnikterimen búgingi kelissózderge «óte ashyq» pozıtsııamen keldi.

- Qazir biz eń aldymen bul protsesti qalaı bastaý kerektigin talqylaý qajet dep esepteımiz, - dedi Ermak qonaq úıdiń foıesinde jýrnalısterge bergen suhbatynda.

Ermak kelisimge kelgennen keıin Reseı qaıtadan shabýyl jasaı almaýy úshin Amerıka Qurama Shtattarynyń qaýipsizdik kepildigi «óte mańyzdy»dedi. Biraq kezdesýdiń basymdyǵy Máskeýmen kelissózder arqyly beıbitshilikke qol jetkizý protsesin bastaý ekenin aıtty.

Memlekettik hatshy Marko Rýbıo Saýd Arabııasyna AQSh pen Ýkraınanyń resmı tulǵalary arasynda áskerı qaqtyǵysty toqtatý maqsatynda kelissózder júrgizý úshin kelgenin jazǵan bolatynbyz.