Saýd Arabııasynda túıege arnalǵan pasport engiziledi
ASTANA. KAZINFORM — Saýd Arabııasy Koroldiginde eldiń mańyzdy mádenı-ekonomıkalyq resýrstarynyń biri sanalatyn túıelerdi tıimdi retteý jáne basqarý maqsatynda resmı túıe pasportyn engizý josparlanyp otyr, dep habarlaıdy Kazinform agenttiginiń menshikti tilshisi.
Koroldiktiń Qorshaǵan orta, sý resýrstary jáne aýyl sharýashylyǵy mınıstriniń aıtýynsha, bul bastama menshik quqyǵyn baqylaýdy jaqsartýǵa, sondaı-aq ortalyqtandyrylǵan ári senimdi derekqor qurý arqyly salanyń ónimdiligi men tıimdiligin arttyrýǵa múmkindik beredi.
Túıe pasporty janýar týraly málimetterdi, onyń tuqymyn, ıesin jáne alǵan vaktsınatsııalaryn qamtıdy.
Qujat túıeni tasymaldaý jáne satý kezinde resmı qujat retinde paıdalanylyp, menshik ıesiniń quqyqtaryn qorǵaýǵa ári ıesin anyqtaýdy jeńildetýge sep bolady.
Gulf News basylymynyń málimetinshe, 2024 jyly Saýd Arabııasyndaǵy mádenı muranyń sımvoly sanalatyn túıelerdiń sany shamamen 2,2 mıllıonǵa jetken. Elde jyl saıyn myńdaǵan qatysýshyny jınaıtyn iri sporttyq-mádenı shara — Korol Abdýlazız atyndaǵy túıeler festıvali ótedi.
Buǵan deıin Saýd Arabııasy sheteldikter úshin kapıtal men jyljymaıtyn múlik naryǵyn ashatyny habarlanǵan edi.