Saýd Arabııasynda sý tasqyny saldarynan sabaqtar toqtatyldy

ASTANA. KAZINFORM – Saýd Arabııasynda nóser jaýyn men sý tasqynyna baılanysty oqý oryndarynda sabaqtar toqtatyldy, dep habarlaıdy Anadoly. 

Saýd Arabııasynyń astanasy — Er-Rııad qalasynda, sondaı-aq eldiń birqatar óńirinde nóser jaýyn men sý tasqyny saldarynan mektepter men joǵary oqý oryndarynda sabaqtar toqtatyldy. Bul týraly Saýd Arabııasynyń Ulttyq meteorologııa ortalyǵy amerıkalyq H áleýmettik jelisinde habarlady.

Málimetke sáıkes, el astanasynda jaýyp jatqan jańbyr tańǵa deıin jalǵasady, sodan keıin birtindep báseńdeıdi dep kútilýde. Áleýmettik jelilerde jarııalanǵan kadrlarda Er-Rııadtyń túrli aýdandarynda sý tasqyny men nóserdiń bolǵany kórinedi.

Azamattyq qorǵanys basqarmasy Er-Rııadta jáne eldiń shyǵys aımaqtarynyń keıbirinde aýa raıynyń qolaısyzdyǵyna baılanysty turǵyndardy saq bolýǵa jáne resmı qaýipsizdik nusqaýlaryn saqtaýǵa shaqyrdy.

Saýd Arabııasynyń memlekettik «Al-Ihbarııa» telearnasy jeksenbi, 12 sáýir kúni el boıynsha kóptegen mektepter men ýnıversıtetterde sabaqtardyń toqtatylǵanyn rastady.

Buǵan deıin Ulttyq meteorologııa ortalyǵy eldiń basym bóliginde seısenbige deıin ortasha, keı jerlerde qatty jańbyr jaýady dep boljaǵan.