Saýd Arabııasynda quramynda ýrany bar 110 mln tonna ken anyqtaldy
ASTANA. KAZINFORM – Koroldik taý-ken ónerkásibin jáne azamattyq atom energetıkasyn damytý aıasynda mıneraldyq resýrstardy zertteýdi jalǵastyryp jatyr, dep habarlaıdy Kazinform agenttiginiń menshikti tilshisi.
Saýd Arabııasynyń shyǵysyndaǵy Mádına aımaǵynda quramynda ýrany bar 110 mln tonna shıkizat anyqtaldy. Bul týraly dúısenbi kúni Venada ótken Atom energııasy jónindegi halyqaralyq agenttiktiń Bas konferentsııasynda Saýd Arabııasynyń Energetıka mınıstri hanzada Abdýlazız bın Salman málimdedi.
🔴 BREAKING: Saudi Arabia has discovered 110 million tons of raw materials containing uranium concentrations in Medina, Saudi Energy Minister Prince Abdulaziz bin Salman says. https://t.co/MVDRQV3LS4
— Al Arabiya English (@AlArabiya_Eng) September 14, 2026
Atalǵan kólem quramynda ýrany bar kenge qatysty. Bul rette ýrannyń naqty mólsheri men onyń naqty kontsentratsııasy týraly aqparat jarııalanbaǵan.
Mınıstrdiń aıtýynsha, Jabal-Saıd ýchaskesinde júrgizilgen geologııalyq barlaý jumystary sırek jer elementteriniń, ásirese aýyr elementterdiń joǵary kontsentratsııasyn, sondaı-aq ýrannyń bolashaǵy zor mólsherin anyqtaǵan.
— Bul jobany qazirgi tańda álemde ıgerilip jatqan sırek jer mıneraldyq resýrstarynyń eń mańyzdy nysandarynyń qataryna qosady, — dedi Abdýlazız bın Salman.
Koroldik mıneraldyq shıkizatty ıgerý boıynsha óz múmkindikterin keńeıtip, halyqaralyq áriptestikti damytýǵa nıetti. Atap aıtqanda, Saýd Arabııasynyń «Maaden» kompanııasy men amerıkalyq «Em-Pı Materıals» kompanııasy sırek jer elementterin óńdeý jáne bólý, sondaı-aq ýrandy ilespe túrde óndirý baǵytynda yntymaqtastyq týraly ýaǵdalasty.
Saýd Arabııasy shógindi jynystardy geologııalyq zertteý baǵdarlamasy aıasynda qosymsha ýran resýrstaryn izdeýdi de jalǵastyryp jatyr.
Bul jańalyq AQSh pen Saýd Arabııasy arasynda azamattyq atom energetıkasy salasyndaǵy yntymaqtastyq týraly shilde aıynda kelisimge qol qoıylǵannan keıin jarııalandy.
Qujat 30 jylǵa eseptelgen jáne Er-Rııad pen Vashıngton arasyndaǵy osy saladaǵy uzaq merzimdi áriptestikti damytýdy kózdeıdi.
Taraptar Saýd Arabııasyna amerıkalyq ıadrolyq tehnologııalarǵa qol jetkizýge múmkindik berip, AQSh kompanııalarynyń Saýd Arabııasynyń atom energetıkasyndaǵy iri jobalarǵa qatysýyna jol ashatyn kelisimniń talaptaryn birneshe jyl boıy talqylaǵan.
«Ýoll-strıt djornal» gazetiniń habarlaýynsha, ýaǵdalastyqtardyń bir tarmaǵynda amerıkalyq kompanııalardyń Saýd Arabııasynda ýran baıytý kásipornyn salý múmkindigin zertteý qarastyrylǵan.
Birneshe kún buryn Saýd Arabııasy shabýyldardan keıin «Shyǵys-Batys» munaı qubyrynyń jumysyn toqtatty.
Aıta ketelik Saýd Arabııasyndaǵy munaı qubyrynyń toqtaýy álemdik munaı kóleminiń 4%-yna qaýip tóndirgen edi.
