Saýd Arabııasynda qajylyqqa zańsyz qajylardy aparǵany úshin alty adam ustaldy

ASTANA. KAZINFORM — Qajylyqqa qatysty qatań erejelerdi aınalyp ótý áreketi birneshe adamnyń ustalýyna, iri aıyppuldarǵa jáne múmkin bolatyn túrme jazasyna alyp keldi, dep habarlaıdy Kazinform agenttiginiń menshikti tilshisi.

Saýd Arabııasynyń Іshki ister mınıstrligi seısenbi kúni qajylyq erejelerin buzǵan alty azamattyń ustalǵanyn habarlady. Olar qajylyq jasaýǵa resmı ruqsaty joq 20 adamdy Mekkege zańsyz kirgizýge árekettengen.

Ustalǵandar qajylyq maýsymynda tártipti qamtamasyz etý maqsatynda Mekke qalasyna kireberisterde qaýipsizdik kúshteriniń kúsheıtilgen sharalary aıasynda qolǵa tústi.

Mınıstrlik sheshimine sáıkes, ereje buzýshylarǵa 100 myń saýd rııalyna (shamamen 13,6 mln teńge) deıin aıyppul salynýy múmkin. Sonymen qatar, aıyp taǵylǵan jaǵdaıda túrme jazasy da qarastyrylǵan.

Bılik zańsyz tasymaldaý úshin paıdalanylǵan kólikterdi tárkileýge jáne ruqsatsyz qajylyq jasaýǵa talpynǵan adamdardan qosymsha 20 myń rııalǵa (shamamen 2,7 mln teńge) deıin aıyppul óndirip alýǵa sheshim shyǵardy.

Mınıstrlik ereje buzýshylardyń aty-jónderin jarııalap, oqıǵaǵa qatysy bar shetel azamattaryn jaza merzimi aıaqtalǵan soń deportatsııalap, olarǵa 10 jylǵa deıin Saýd Arabııasyna qaıta kirýge tyıym salýdy tapsyrdy.

Vedomstvo barlyq azamat pen turǵyndy qajylyqqa qatysty bekitilgen erejelerdi qatań saqtaýǵa shaqyrdy, bul qajylardyń qaýipsizdigi men amandyǵyn qamtamasyz etý úshin qajet.

Seısenbi kúni Saýd Arabııasynyń bıligi qajylyqqa qatysý úshin elge 1,1 mıllıon adamnyń kelgenin habarlady.

Aıta ketelik Saýd Arabııasy qajylyq erejelerin buzǵandarǵa qatań aıyppuldar engizgeni týraly habarlaǵan edik.