Saýd Arabııasynan 343 otandasymyz elge jetkiziledi
ASTANA. KAZINFORM — Erteń, 4 naýryzda Saýd Arabııasynyń Jıdda qalasynan 343 otandasymyzdy elge jetkizý josparlanyp otyr. Bul týraly Syrtqy ister mınıstriniń orynbasary Álibek Baqaev málim etti.
— Erteń Jıddadan Qazaqstannyń 343 adamy jetkiziledi. Bul — ushyp keletin alǵashqy top, — dedi mınıstr orynbasar Úkimet otyrysynan keıin.
Onyń málimetinshe, eń aldymen tizimge áıelder men kámeletke tolmaǵan balalar, 60 jastan asqan azamattar, sonymen qatar naqty bir aýrýy bar tulǵalar engizilgen.
— Balalardyń jalpy sanyn qazir aıta almaımyn. Óıtkeni, áli tolyq jasaqtalyp bolǵan joq. Biz adamdarymyzdy Jıdda men Maskat qalasyna shoǵyrlandyryp jatyrmyz. Olar bortqa otyrǵannan keıin ǵana naqty sany belgili bolady, — dedi Álibek Baqaev.
Buǵan deıin Qazaqstan azamattary Iran aýmaǵynan jer joldar arqyly shyǵarylatynyn jazǵan edik.
Aıta keteıik, FlyDubai áýe kompanııasy Dýbaıdan Almaty men Astanaǵa 306 jolaýshyny jetkizdi.