Saýd Arabııasyna menıngokokqa qarsy vaktsınasyz kirýge ruqsat joq
ASTANA. KAZINFORM – Saýd Arabııasynyń Densaýlyq saqtaý mınıstrligi 2024 jyly qajylyqqa barý úshin vaktsınalaý nusqaýlaryn jarııalap, onyń qajylyqqa barýshy barlyq adamdardyń densaýlyǵyn saqtaýdaǵy mańyzdylyǵyn atap kórsetti. Kazinform agenttiginiń tilshisi Qazaqstannan qajylyqqa baratyndardan qandaı ekpe talap etiletinin naqtylady.
2024 jylǵy qajylyq (musylman hronologııasy boıynsha 1445) 14 maýsymda bastalady, qazaqstandyq qajylar kıeli jerlerge aldyn ala – 5 maýsymnan bastap barady.
Jyl saıyn qajylyqqa álemniń túkpir-túkpirinen eki mıllıonǵa jýyq dindar keledi. 2024 jyly Saýd Arabııasynyń Qajylyq jáne ýmra mınıstrligi Qazaqstanǵa 10 myń oryndyq kvota bóldi.
Jyl saıyn Saýd Arabııasynyń Densaýlyq saqtaý mınıstrligi aldaǵy qajylyq jáne ýmra kezinde koroldikke barǵysy keletin qajylyq jasaýshylar men maýsymdyq jumysshylar úshin kirý vızasy talaptary men nusqaýlaryn jarııalaıdy.
Saýd Arabııasyna barý úshin menıngokoktyq menıngıt, polıomıelıt jáne sary bezgekke qarsy ekpe bolýy tıis.
Menıngokokty menıngıt
Barlyq elderden, sonyń ishinde Qazaqstannan qajylyqqa barýshylar úshin mı men julyndy zaqymdaıtyn jáne aýa-tamshyly jolmen beriletin aýyr bakterııalyq ınfektsııadan qorǵaıtyn menıngokokty menıngıtke qarsy vaktsına qajet etiledi.
Saýd Arabııasy qajylyqqa nemese ýmraǵa keletin bir jastan asqan barlyq saıahatshylardan tórt valentti (ACWY) menıngokokqa qarsy vaktsınany sońǵy 3-5 jyl ishinde (vaktsınanyń túrine baılanysty) jáne qajylyqqa barý aldynda keminde 10 kún ishinde alǵanyn rastaýdy talap etedi. Bul vaktsına A, C, W jáne Y serotoptary týdyratyn menıngokokk aýrýynan qorǵaý úshin usynylady.
Sary bezgek jáne polıomıelıt
Qajylyqqa barýshylardyń sary bezgek pen polıomıelıtke qarsy ekpeleri de bolýy tıis. Talap bul aýrý túrleriniń taralý qaýpi bar elder tiziminen kelgen qajylyqqa barýshylarǵa qatysty, oǵan Qazaqstan kirmeıdi.
Maýsymdyq tumaý
Saýd Arabııasynyń Densaýlyq saqtaý mınıstrligi sheteldegi qajylarǵa koroldikke kelmes buryn maýsymdyq tumaýǵa qarsy ekpe alýdy usynady. Bul ásirese tumaýdan aýyr syrqattaný qaýpi joǵary adamdar, sonyń ishinde júkti áıelder, bes jasqa deıingi balalar, egde jastaǵy adamdar jáne densaýlyq jaǵdaıy nashar adamdarǵa qatysty.
Jalpy usynystar
Saýd Arabııasynyń Densaýlyq saqtaý mınıstrligi qart adamdarǵa (65 jastan asqan), sozylmaly aýrýlary bar adamdarǵa (mysaly, júrek aýrýy, búırek aýrýy, tynys alý joldarynyń aýrýlary, qant dıabeti) jáne ımmýn tapshylyǵy, qaterli jáne ólim týdyrýshy aýrýlary bar qajylarǵa, júkti áıelder men 12 jasqa tolmaǵan balalarǵa qajylyqqa óz qaýipsizdigi úshin barýdy keıinge qaldyrýdy usynyp otyr.
Saýd Arabııasynyń Densaýlyq saqtaý mınıstrligi sonymen qatar barlyq qajylardy tynys alý joldarynyń juqpaly aýrýlarynyń taralýyn toqtatý úshin jalpy densaýlyq saqtaý erejelerin saqtaýǵa shaqyrdy.
Saýd Arabııasy densaýlyq saqtaý organdarynyń qajylyqqa barýshylarǵa qoıylatyn tolyq talaptaryn Koroldik Densaýlyq saqtaý mınıstrliginiń saıtynda aǵylshyn jáne arab tilderinde tabýǵa bolady.
