Saýd Arabııasyna qonys aýdarǵan aqtóbelik terrorızmdi nasıhattaǵany úshin aıyptalyp jatyr
AQTÓBE. KAZINFORM - Ol bıyl elge ekstradıtsııalandy. Al qylmystyq istiń qozǵalǵanyna 7 jylǵa jýyq ýaqyt boldy.
Aqtóbe qalalyq sotynda 51 jastaǵy aqtóbelikke qatysty is qaralyp jatyr. Oǵan Qylmystyq kodekstiń «Terrorızmdi nasıhattaý nemese terrorızm aktisin jasaýǵa jarııa túrde shaqyrý» baby boıynsha aıyp taǵyldy. Іs materıalyna súıensek, sottalýshy 2008 jyly Almaty qalasy arqyly Saýd Arabııasyna qonys aýdaryp, Mádınada turǵan. Sol jaqta júrip Telegram arqyly tanystaryna terrorızmdi nasıhattaıtyn mátin jibergen. Sot otyrysy kezinde prokýror birneshe saraptama taǵaıyndalǵanyn, qorytyndysynda mátinde terrorızmdi nasıhattaý belgileri bar ekenin atap ótti.
- Men Saýd Arabııasyna áıelimmen jáne úsh balammen bardym. Islam dinin qabyldaǵan soń bilimimdi tereńdetkim keldi. Onda 2008 jyldan bastap 2026 jylǵa deıin sonda turdym. Habarlama jibergen adamdardyń biri 2018 jyly Mádına qalasyna kelip, oqýǵa tústi. Sodan tanımyn. Ekinshi adammen Aqtóbedegi meshitte tanysqan edim. Al úshinshi adam esimde joq. Qazirgi ýaqytta ózimniń qateleskenimdi túsindim, ókinemin. Terrorızmdi nasıhattaıtyn mátin ekenin bilmedim,- dedi sottalýshy.
Sot otyrysy kezinde sottalýshynyń uıaly telefonǵa saqtaǵan vıdeolary kórsetildi. Onda qarýly qaqtyǵystar jaıly beınematerıal bar.
Aıta keteıik, sottalýshyǵa 2019 jyldan bastap izdeý jarııalandy. Keıin Interpol arqyly halyqaralyq izdeý bastaldy. Jyl saıyn isti tergeý ýaqyty sozylyp, keıde ýaqytsha toqtatyldy. Bıyl ustalyp, Qazaqstanǵa, onyń ishinde Aqtóbe óńirine ekstradıtsııalandy. Sottalýshynyń qorǵaýshysy protsestik kelisimge kelýdi surap otyr.
Eske salsaq, bıyl dombyrany haram degen aqtóbelik bas bostandyǵynan aıyryldy.
