Saýd Arabııasy Iemenge áýeden bir táýlikte 35 soqqy jasady
ASTANA. KAZINFORM — Saýd Arabııasy sońǵy 24 saǵat ishinde Iemenniń bes provıntsııasyna 35 ret áýeden soqqy jasady, dep habarlaıdy Anadoly.
Bul týraly Iran qoldaıtyn ıemendik «Ansarýlla» (hýsıtter) qozǵalysymen baılanysty «Saba» aqparat agenttigi habarlady.
Málimetke sáıkes, áýe soqqylary Taız, Ál-Djaýf, Amran, Saada jáne Hodeıda provıntsııalaryna, sonyń ishinde azamattyq nysandarǵa jasalǵan. Saýd Arabııasy ázirge bul málimdemelerge qatysty pikir bildirgen joq.
Jaǵdaıdyń ýshyǵýyna baılanysty Taız jáne Lahdj provıntsııalarynda úkimet kúshteri men hýsıtter arasyndaǵy qaqtyǵystar da kúsheıe tústi. BUU elde beıbitshilik pen turaqtylyq ornatý úshin taraptardy birlesip áreket etýge shaqyrdy.
BUU-nyń Gýmanıtarlyq máselelerdi úılestirý basqarmasy Iemendegi urys qımyldarynyń kúsheıýi, halyqtyń qonys aýdarýy jáne ashtyq balalarǵa tónetin qaýip-qaterdi arttyryp otyrǵanyn eskertti. Tekserýden ótken shamamen 2,9 myń qonys aýdarǵan balanyń 25 paıyzdan astamy qatty ashyǵýdan jáne durys tamaqtanbaýdan zardap shegedi, olardyń 200-ge jýyǵynyń jaǵdaıy aýyr.
Buǵan deıin hýsıtter Saýd Arabııasynyń Iemenge 28 ret áýe soqqysyn jasaǵanyn málimdegen bolatyn.
Sonymen qatar Saýd Arabııasy hýsıttermen qaqtyǵys ýshyqqan tusta áskerı daıyndyǵyn kúsheıtip jatyr.
Hýsıtter tarapynan shıelenistiń kúsheıýine baılanysty Iemen Ókilder palatasy jalpy mobılızatsııa jarııalaý týraly sheshimdi maquldady.
