Saýd Arabııasy Iemen úkimetine shamamen 368 mln dollar kóleminde kómek kórsetedi
ASTANA. KAZINFORM — Saýd Arabııasy Prezıdenttik keńestiń tóraǵasy Rashıd ál-Alımı basqaratyn Iemen úkimetine shamamen 368 mln dollar kóleminde qarjylyq kómek kórsetiletini týraly habarlady, dep jazdy Anadoly.
Saýd Arabııasynyń Syrtqy ister mınıstrligi málimetinshe, qarajat Iemendi damytý jáne qalpyna keltirý baǵdarlamasy aıasynda bólinedi jáne eldiń ekonomıkalyq damýyn qoldaýǵa baǵyttalady. Jalpy kómek somasy 1,38 mlrd rııaldan (shamamen 368 mln dollar) asady.
Málimdemede bul qarajatty bólý týraly sheshim korol Salman ıbn Abdýlazızdiń buıryǵymen jáne murager hanzada Muhammed ıbn Salmannyń usynysy boıynsha, Iemendegi aýyr ekonomıkalyq jaǵdaıdy eskere otyryp qabyldanǵany aıtylǵan.
Kómek prezıdent ál-Alımıdiń ótinishi boıynsha kórsetilip, Saýd Arabııasynyń Iemen úkimetine kórsetetin qoldaýynyń bir bóligi bolady. Qarajat densaýlyq saqtaý, memlekettik bıýdjet jáne munaı salasyna baǵyttalady.
2014 jyldyń qyrkúıeginen bastap Iemenniń astanasy Sana jáne birneshe aımaqty Iran qoldaıtyn hýsıtter baqylaýda ustap otyr. 2015 jyldyń naýryzynan bastap Saýd Arabııasy basshylyq etetin koalıtsııa Iemen úkimetine hýsıtterge qarsy kúreste kómektesip keledi.
Iemen — álemdegi eń kedeı elderdiń biri, onda on jyldan astam azamattyq soǵys saldarynan úlken gýmanıtarlyq daǵdarys bolyp jatyr. BUU málimeti boıynsha, 30 mıllıondyq halyqtyń 22 mıllıonnan astamy gýmanıtarlyq kómek pen qorǵanysqa muqtaj. Taza sý tapshylyǵy, ashtyq jáne dári-dármek jetispeýshiligi aýrýlardyń, onyń ishinde holera epıdemııasynyń taralýyna yqpal etedi.
Eske salsaq, tamyzdyń aıaǵynda Izraıldiń áskerı ushaqtary Iemen astanasy Sana qalasyndaǵy úkimettik jáne áskerı nysandarǵa birqatar áýe soqqysyn jasady.
Keıinnen ıemendik hýsıtter úkimet basshysynyń qaza bolǵanyn rastady.
Izraıldiń Iemenge soqqysynan qaza bolǵandar sany 46-ǵa jetkeni belgili boldy.