Saýd Arabııasy Túrkııaǵa deıingi temirjol jobasyn jyl sońyna deıin aıaqtaýǵa nıetti
ASTANA. KAZINFORM — Salıh ál-Djasır Saýd Arabııasy men Túrkııa-ny Iordanııa jáne Sırııa arqyly baılanystyratyn temirjol jobasyna qatysty birlesken jumystar jyl sońyna deıin aıaqtalatynyn aıtty, dep jazdy Anadoly agenttigi.
Al Arabiya telearnasyna bergen suhbatynda Saýd Arabııasynyń kólik mınıstri Salıh ál-Djasır Túrkııa, Iordanııa jáne Sırııa arqyly ótetin temirjol jelisine qatysty birlesken tehnıkalyq-ekonomıkalyq zertteýlerdiń jyl sońyna deıin aıaqtalýy kútiletinin aıtty.
Mınıstrdiń aıtýynsha, Saýd Arabııasy men Túrkııa-ny Iordanııa jáne Sırııa arqyly baılanystyratyn temirjol jobasyna qatysty jumystar jalǵasyp jatyr.
— Temirjolǵa qatysty birlesken jumystardyń jyl sońyna deıin aıaqtalýy kútiledi, — dedi mınıstr.
Túrkııa–Sırııa–Iordanııa jelisi boıynsha jumystar jalǵasyp jatyr
Abdýlkadır Ýraloǵlý, Túrkııa kólik jáne ınfraqurylym mınıstri, buryn Iordanııa-ǵa sapary barysynda Túrkııa, Sırııa jáne Iordanııany baılanystyratyn «zamanaýı Hıdjaz temirjolyn» salý jospary týraly aıtqan.
Ýraloǵlý bul úsh el arasynda salynatyn temirjol jelisin bolashaqta Saýd Arabııasy men Oman-ǵa deıin keńeıtý josparlanyp otyrǵanyn atap ótti.
Onyń aıtýynsha, joba iske asqan jaǵdaıda Iordanııadan júk tasymaly Sırııa arqyly Túrkııaǵa jetkizilip, odan ári Eýropa men Ortalyq Azııaǵa baǵyttalady.
— Osylaısha, Qyzyl teńizdi Jerorta teńizimen jáne Eýropamen baılanystyrý josparlanyp otyr, — dedi mınıstr.
Eske sala keteıik, buǵan deıin Doha men Er-Rııad arasyn joǵary jyldamdyqty temirjol baılanystyratynyn jazǵan edik.
