Saýd Arabııasy Sırııanyń Dúnıejúzilik bankke qaryzyn óteýge nıetti
ASTANA. KAZINFORM — Er-Rııad 15 mıllıon dollar tóleıdi, bul Damaskke qarjylyq kómek alýǵa múmkindik beredi, dep habarlaıdy Kazinform menshikti tilshisi.
Saýd Arabııasy halyqaralyq qarjylyq kómekke, atap aıtqanda, ınfraqurylymdy qalpyna keltirýge jáne daǵdarysty bastan keshirip otyrǵan eldiń memlekettik sektoryna qoldaý kórsetýge arnalǵan mıllıondaǵan dollarlyq granttarǵa qoljetimdilikti ashý úshin Sırııanyń Dúnıejúzilik bank aldyndaǵy qaryzyn óteýdi kózdep otyr. Bul týraly úsh aqparat kózine silteme jasap Reuters habarlady.
Másele shamamen 15 mln dollar bolyp otyr — bul Dúnıejúzilik bank tarapynan kómek kórsetý baǵdarlamalaryn qalpyna keltirý úshin qajet soma.
Eger Er-Rııadtyń jospary júzege asatyn bolsa, bul 2024 jyly burynǵy prezıdent Bashar Asad bılikten qýylǵannan keıin Saýd Arabııasynyń Sırııaǵa qarjylaı qoldaý kórsetýiniń belgili alǵashqy oqıǵasy bolmaq.
Agenttik derekkózderi sondaı-aq bul Parsy shyǵanaǵy elderiniń Sırııanyń jańa bıligin qoldaý úderisine birtindep qosylýyn tanytýy múmkin ekenin kórsetedi. Buǵan deıin Katardyń sırııalyq memlekettik qyzmetkerlerdiń jalaqysyn qarjylandyrýǵa qatysty osyndaı bastamasy AQSh-tyń sanktsııalyq saıasatyna qatysty belgisizdikke baılanysty keıinge qaldyrylǵan bolatyn.
Olaı bolǵanymen, naýryz aıynda Doha energııamen qamtamasyz etýdi ishinara turaqtandyrý maqsatynda Sırııaǵa Iordanııa aýmaǵy arqyly gaz jetkizý josparyn jarııalady. Reuters málimetinshe, Vashıngton bul bastamaǵa beıresmı kelisim bergen.
Osy arada sırııalyq SANA aqparat agenttiginiń habarlaýynsha, Sırııanyń Qarjy mınıstri Muhammed ıAser Barnııa dúısenbide Dúnıejúzilik banktiń tehnıkalyq delegatsııasymen kelissóz júrgizdi. Bul — Sırııanyń jańa ákimshiligi ókilderiniń halyqaralyq qarjy uıymymen alǵashqy ashyq kezdesýi.
Taraptar qarjylyq-ekonomıkalyq yntymaqtastyqty nyǵaıtý perspektıvalaryn, sonyń ishinde buzylǵan energetıkalyq ınfraqurylymdy qalpyna keltirý jáne memlekettik sektordaǵy eńbekaqy qoryn qoldaý múmkindikterin talqylady. Sırııa Qarjy mınıstrliginiń basshysy halyqaralyq sanktsııalar men burynǵy ekonomıkalyq saıasattyń eldiń bank júıesine tıgizgen keri áserin de basa aıtty.
Habarlanǵandaı, Sırııa delegatsııasy Damaskide bılik aýysqan sátten bastap alǵash ret Dúnıejúzilik bank pen HVQ kóktemgi sessııalaryna qatysý úshin Vashıngtonǵa barýǵa daıyndalyp jatyr. Delegatsııanyń amerıkalyq sheneýniktermen kezdesý ótkizbeıtini kútilip otyr, alaıda onyń qatysýynyń ózi mańyzdy oqıǵa retinde qarastyrylady.
Іshinara gýmanıtarlyq kómek kórsetilse de, Asad bıligi kezinde Sırııaǵa salynǵan sanktsııalardyń kópshiligi kúshinde qaldy. Ótken aıda AQSh prezıdenti Donald Tramptyń ákimshiligi sırııalyq tarapqa sharttardyń tizbesin tapsyrdy, olardyń oryndalýy shekteýlerdi ishinara jeńildetýge ákelýi múmkin.
Eske sala ketsek, BAÁ men Sırııa prezıdentteri ekijaqty baılanysty nyǵaıtý máselesin talqylady.
Buǵan deıin qazaqstandyq bitimgerler Sırııadan elge oralǵanyn jazǵan bolatynbyz.