Saýd Arabııasy «Shyǵys – Batys» munaı qubyrynyń jumysyn qaıta bastady
ASTANA. KAZINFORM – Saýd Arabııasy koroldiktiń strategııalyq eksporttyq baǵyty sanalatyn «Shyǵys – Batys» munaı qubyrynyń jumysyn qaıta bastady. Bul álemdik naryqqa munaı jetkizýge qatysty alańdaýshylyqty azaıtty, dep habarlaıdy Kazinform-nyń menshikti tilshisi.
Saýd Arabııasy seısenbi kúni «Shyǵys – Batys» munaı qubyryn qaıta iske qosty. Sol kúni Qyzyl teńiz jaǵalaýyndaǵy ıAnbý portynan munaı jóneltý bastalýy múmkin. Bul týraly Reuters jaǵdaıdan habardar úsh derekkózge silteme jasap habarlady.
Agenttiktiń eki derekkózi atap ótkendeı, qubyr iske qosylǵannan keıin munaı ázirge tómen jyldamdyqpen aıdalyp jatyr. Saudi Aramco munaı tasymaldaý kólemin birtindep táýligine 4 mln barrelge deıin jetkizýdi josparlap otyr. Alaıda munaı qubyrynyń jumysyn tolyq qalpyna keltirý birneshe aptaǵa sozylýy múmkin. Kompanııa bul jaǵdaıǵa qatysty resmı túsinikteme bergen joq.
Saudi Arabia restarts East-West oil pipeline, sources say https://t.co/CxtsbH3SBV https://t.co/CxtsbH3SBV
— Reuters (@Reuters) September 22, 2026
Munaı aıdaýdyń qaıta bastalýy Saudi Aramco-nyń Qyzyl teńiz jaǵalaýyndaǵy munaı óńdeý kásiporyndaryna shıkizat jetkizýdi qalpyna keltirýge múmkindik beredi. Alǵashqy tankerdi seısenbi kúni ıAnbý portynda tıeý josparlanyp otyr. Odan keıin keme Qytaıǵa baǵyt alady.
Saýdagerler de Qyzyl teńiz arqyly Saýd Arabııasynyń munaı eksportyn qaıta bastaǵannan keıin kemeden kemege munaı aýystyryp tıeý úshin tankerlerdi Mysyrdyń Port-Saıd jáne Sıdı-Krır porttaryna baǵyttaı bastady.
Buǵan deıin Bloomberg pen The Wall Street Journal munaı qubyry operatory uzyndyǵy shamamen 1,2 myń shaqyrym bolatyn qubyrdyń beriktigi men qysymǵa tózimdiligin teksergenin habarlaǵan edi. Synaqtar ıAnbý portynan munaı aıdaý men jóneltýdi qaıta bastar aldynda júrgizilgen.
Eske sala keteıik, «Shyǵys – Batys» munaı qubyry 13 qyrkúıekte bolǵan dron shabýyldarynan keıin toqtatylǵan edi. Sonyń saldarynan ıAnbý portynda munaı tıeý jumystary toqtady.
AQSh pen Izraıldiń Iranǵa qarsy soǵysy aıasynda Ormýz buǵazy arqyly keme qatynasy qysqarǵannan keıin bul baǵyttyń mańyzy erekshe artty.
Qubyr toqtatylǵanǵa deıin ıAnbý portyna táýligine shamamen 4 mln barrel munaı jetkizilgen. Bul álemdik munaı usynysynyń shamamen 4%-yna teń.
Munaı jetkizýdiń qaıta bastalýy álemdik naryqtaǵy baǵanyń tómendeýin kúsheıtti. Brent markaly munaı fıýchersteriniń baǵasy barreline 2 dollardan astam arzandap, 8 qyrkúıekten bergi eń tómen deńgeıge jetti.
