Saýd Arabııasy iri ınvestıtsııalyq forýmdy 2027 jylǵa shegerdi
ASTANA. KAZINFORM — Saýd Arabııasyndaǵy qaýipsizdiktiń shıelenisýine baılanysty Er-Rııadta 26-29 qazanǵa josparlanǵan is-shara keıinge qaldyryldy.
«Shól dalanyń Davosy» dep atalatyn Future Investment Initiative (FII) halyqaralyq ınvestıtsııalyq forýmnyń uıymdastyrýshylary dúısenbi kúni 26-29 qazan aralyǵynda Er-Rııadta ótetin onynshy mereıtoılyq is-sharanyń 2027 jylǵa shegerilgenin habarlady.
Mundaı sheshim Saýd Arabııasyndaǵy nysandarǵa ıemendik hýsıtterdiń zymyran jáne dron shabýyldary jıilegen tusta qabyldanǵan.
Forýmnyń jańa ótetin kúni jaqyn arada jarııalanady. Buǵan deıin rásimdelgen tirkeýler men seriktestik kelisimder óz kúshin saqtaıdy.
A message from the CEO of FII Institute #FII10 The Power of Legacy. https://t.co/11Xvf1f5RN
— FII Institute (@FII_Institute1) October 19, 2026
FII ınstıtýtynyń bas dırektory hanshaıym Maha bınt Mısharı bın Abdel Azız forýmdy keıinge shegerý týraly sheshim sharany joǵary deńgeıde uıymdastyryp, halyqaralyq qatysýshylardyń tolyqqandy ókildigin qamtamasyz etý maqsatynda qabyldanǵanyn aıtty.
Onyń sózinshe, uıymdastyrýshylar on jyldyq jetistikterdi, strategııalyq áriptestik pen birlesken bastamalardy qamtıtyn mereıtoılyq forým ótkizýdi kózdep otyr.
Alaıda resmı málimdemede forýmdy keıinge shegerý qaýipsizdik jaǵdaıynyń ýshyǵýyna tikeleı baılanystyrylmaǵan.
Reuters málimetinshe, forýmdy qatysýshylardyń bir bóligi onlaın qatysatyn aralas formatta ótkizý nusqasy da qarastyrylǵan. Alaıda keıin is-sharany tutastaı 2027 jylǵa shegerý týraly sheshim qabyldandy.
Semafor basylymynyń málimetinshe, iri halyqaralyq bankter men ınvestıtsııalyq qorlardyń basshylary aldaǵy forým kezinde týyndaýy múmkin qaýipsizdik qaterlerine alańdaýshylyq bildirgen.
Qaýipsizdikke qatysty alańdaýshylyq Saýd Arabııasynyń memlekettik ınvestıtsııalyq qorynyń basshysy ıAsır ar-Rýmaııanǵa jetkizilgen. Al kompanııa jetekshilerine forýmǵa jeke qatysýǵa qatysty qysym kórsetilgen.
Aldyn ala jarııalanǵan baǵdarlamaǵa sáıkes, forýmǵa Goldman Sachs dırektorlar keńesiniń tóraǵasy ári bas dırektory Devıd Solomon, Standard Chartered basshysy Bıll Ýınters jáne Citigroup bas dırektory Djeın Freızer qatysady dep josparlanǵan.
Future Investment Initiative forýmy Saýd Arabııasy memleketiniń qoldaýymen ótkiziledi. Sońǵy jyldary ol jahandyq ınvestıtsııalardy talqylaıtyn jetekshi halyqaralyq alańdardyń birine aınaldy. Dúnıejúzilik ekonomıkalyq forýmmen uqsastyǵyna baılanysty bul shara beıresmı túrde «Shól dalanyń Davosy» dep atalady.
Er-Rııad úshin bul forýmnyń mańyzy zor. Ol koroldiktiń munaı kirisine táýeldiligin azaıtyp, týrızm, sport, tehnologııa jáne ózge de munaıdan tys salalarǵa qomaqty ınvestıtsııa tartýdy kózdeıtin Vision 2030 ekonomıkalyq jańǵyrý baǵdarlamasyn júzege asyrýǵa baǵyttalǵan.
Forýmnyń keıinge shegerilýi Saýd Arabııasy men Iran qoldaıtyn ıemendik hýsıtter arasyndaǵy qarýly qaqtyǵystyń kúrt shıelenisken kezeńine tuspa-tus keldi. Keıingi aptalarda hýsıtter koroldiktiń áskerı, energetıkalyq jáne azamattyq ınfraqurylymyna, sonyń ishinde Saudi Aramco memlekettik munaı kompanııasynyń bas keńsesi men Er-Rııad halyqaralyq áýejaıyna birqatar shabýyl jasaǵan.
Buǵan deıin Qazaqstan men Saýd Arabııasy energetıka, sý jáne agroónerkásip salalaryndaǵy yntymaqtastyqty keńeıtip jatqanyn habarlaǵan edik.
