Saýd Arabııasy, Pákistan jáne Túrkııa áskerı yntymaqtastyqty kúsheıtedi
ASTANA. KAZINFORM – Saýd Arabııasy, Pákistan jáne Túrkııanyń áskerı basshylyǵy birlesken qorǵanys jónindegi Mekke kelisimi aıasyndaǵy mindettemelerdi oryndaý jáne áskerı yntymaqtastyqty odan ári nyǵaıtý qajettigin málimdedi, dep habarlaıdy Tasnim.
Er-Rııadta úsh eldiń áskerı basshylyǵynyń kezdesýi ótti. Taraptar qaýipsizdik salasyndaǵy jaǵdaıdy jáne Saýd Arabııasy tap bolyp otyrǵan qaterlerdi talqylady.
Agenttik Pákistan armııasynyń málimdemesine silteme jasap habarlaǵandaı, kezdesý qatysýshylary «Ansar Allah» qozǵalysynyń Saýd Arabııasyna, sonyń ishinde ekonomıkalyq ınfraqurylym nysandaryna jasaǵan shabýyldaryn aıyptady.
Áskerı ókilder sondaı-aq úsh eldiń qarýly kúshteri arasyndaǵy ózara is-qımyldy keńeıtý, aqparat almasý, úılestirýdi kúsheıtý jáne áskerı múmkindikterdi ıntegratsııalaý máselelerin qarastyrdy.
Tasnim málimetinshe, bul sharalar tejeý áleýetin jáne ujymdyq qorǵanys tetikterin nyǵaıtýǵa baǵyttalǵan.
Kezdesýge qatysýshylar Saýd Arabııasynyń qaýipsizdigin, egemendigi men aýmaqtyq tutastyǵyn qorǵaýǵa beıildi ekenin de rastady.
Aıta keteıik, buǵan deıin Saýd Arabııasy, Túrkııa jáne Pákistannyń Bas shtab bastyqtary Mekke kelisimi aıasynda Er-Rııadty qoldaý máselesin talqylaıtyny habarlanǵan edi.
