Saýd Arabııasy Netanıahýdyń palestınalyqtardy kóshirý týraly usynysyn aıyptady

ASTANA. KAZINFORM – Er-Rııad pen aımaq elderi Izraıl premer-mınıstriniń Saýd Arabııasy aýmaǵynda Palestına memleketin qurý múmkindigi týraly «ázilin» jaqtyrmaı qaldy, dep habarlaıdy Kazinform menshikti tilshisi.

- Saýd Arabııasy premer-mınıstr Bınıamın Netanıahýdyń palestınalyqtardy Gazadan shyǵarý týraly málimdemelerinen úzildi-kesildi bas tartatynyn qaıtalaıdy, - delingen Syrtqy ister mınıstrliginiń málimdemesinde.

Orynsyz ázil

Bul málimdeme Netanıahý buryn Izraıl telearnasynda palestınalyqtardyń Saýd Arabııasynda memleket qura alady dep ázildegeninen keıin jasaldy, dep habarlaıdy The Times of Israel.

Beısenbi kúni 14-shi arnadaǵy áńgimelesý barysynda júrgizýshi ıAakov Bardýgo Er-Rııadtyń Izraılmen qarym-qatynasty qalypqa keltirýdiń alǵysharttary týraly aıtqan kezde qatelesip, «Palestına memleketin» «Saýd memleketi» dep atady.

Netanıahý ony túzetýge asyǵys boldy, biraq «saýdııalyqtar Saýd Arabııasynda Palestına memleketin qura alady» dep ázildep jaýap berip, «olardyń jeri kóp» ekenin atap ótti. Júrgizýshi bul qyzyq ıdeıa, ony joqqa shyǵarýǵa bolmaıdy dep jaýap bergende, Netanıahý óz sózin qaıtalap, Saýd Arabııasynyń «terrıtorııasynyń aýqymdy» ekenin aıtty. 

Israeli Prime Minister Benjamin Netanyahu, during his visit to Washington, was interviewed by Channel 14, where he dismissed the possibility of a Palestinian state, calling it a "reward for terrorism." pic.twitter.com/Ug9haBCs1Z

— Middle East Eye (@MiddleEastEye) February 7, 2025

Eske sala ketsek, Saýd Arabııasy Gaza sektorynan palestınalyqtardy yǵystyrýǵa baǵyttalǵan kez kelgen áreketten bas tartatynyn atap ótip, Palestına memleketi qurylmaı Izraılmen qatynas ornatpaıtynyn ashyq bildirdi.

Arab álemi aıyptap otyr 

Netanıahýdyń sózderi arab memleketteriniń narazylyǵyn týdyrdy.

Saýd Arabııasynyń Syrtqy ister mınıstrligi jeksenbi kúni palestınalyqtardy Gazadan shyǵarý týraly kez kelgen málimdemeni úzildi-kesildi qabyldamaıtynyn málimdedi. Sonymen birge, Saýd Arabııasynyń málimdemesinde premer-mınıstrdiń Saýd Arabııasy aýmaǵynda Palestına memleketin qurý týraly túsiniktemelerine tikeleı silteme joq.

- Izraıldiń ekstremıstik, okkýpatsııalyq mentalıteti Palestına jeriniń baýyrlas Palestına halqy úshin neni bildiretinin jáne onyń osy jermen emotsıonaldy, tarıhı jáne quqyqtyq baılanysyn túsinýge kedergi jasaıdy, - delingen málimdemede.

Arab memleketteri lıgasy (AML) da Izraıl premer-mınıstriniń sózderin synǵa alyp, bul sózderdiń shyndyqtan múldem alshaq jatqanyn málimdedi.

Ol jaqynda BAQ-qa bergen suhbatynda Netanıahý aıtqan ıdeıalar «qııal nemese ıllıýzııadan basqa eshteńe emes» dep atap ótti.

Katar memleketi de premer-mınıstr Bınıamın Netanıahýnyń málimdemesin aıyptap, ony «arandatýshylyq» dep sıpattady.

Iordanııa SІM Saýd Arabııasy aýmaǵynda Plaestına memleketin qurý týraly málimdemesin aıyptap, buny halyqaralyq quqyqty óreskel buzatyn arandatý áreketi dedi.

Vedomstvo ókili Sýfıan Kýda Izraıl úkimeti arandatýshylyq saıasatyn jalǵastyryp, memlekettiń egemendigi men halyqaralyq quqyqqa nuqsan keltiretin málimdemeler jasap jatqanyn basa aıtty.

Gazadaǵy palestınalyqtardyń taǵdyry týraly pikirtalastar prezıdent Donald Tramptyń ótken aptada AQSh Izraılden «Gazany tartyp alady» jáne palestınalyqtardy basqa jerge qonystandyrý arqyly «Taıaý Shyǵystyń Rıverasyn» jasaıdy degen tańqalarlyq usynysynyń kóleńkesinde qaldy.

Arab memleketteri Tramptyń Gazadaǵy soǵysta atysty toqtatý kezinde aıtqan sózderin qatań aıyptady.

Tramp sonymen qatar Saýd Arabııasy Izraılmen qarym-qatynasty qalypqa keltirýdiń sharty retinde Palestına memleketin qurýdy talap etpeıtinin málimdedi. Biraq Er-Rııad onyń málimdemesin qabyldamaı, óziniń ustanymyn «AQSh-tyń burynǵy ákimshiligi men qazirgi ákimshiligine jetkizgenin» basa aıtty. Onda Palestına memleketin qurmaıynsha Izraılmen qarym-qatynastyń qalypqa kelmeıtini aıtylǵan.

Osyǵan deıin Mysyr men Iordanııa palestınalyqtardy qonystandyrýǵa qarsy ekeni týraly jazdyq.