Saýd Arabııasy men Pákistan jaýdan birlesip qorǵanbaq

ASTANA. KAZINFORM – Saýd Arbııasynyń resmı aqparat agenttigi SPA-nyń málimetterine qaraǵanda, osy elde saparmen júrgen Pákistannyń premer-mınıstri Sharıf Er-Rııadtaǵy Iemam saraıynda Saýd Arabııasynyń taq murageri Muhammed bın Salmanmen kezdesti, dep habarlaıdy Anadoly.

Delegatsııalardyń qatysýymen bolǵan resmı kelissózder barysynda eki el arasyndaǵy tarıhı jáne strategııalyq qarym-qatynastar men birlesip atqarylýy tıis birqatar yntymaqtastyq máseleleri talqylandy.

Kezdesý qorytyndysy boıynsha, bın Salman men premer-mınıstr Sharıf eki eldiń qaýipsizdigin nyǵaıtý men óńirde jáne álemdegi beıbitshilikti qamtamasyz etý maqsatynda «Birlesken strategııalyq qorǵanys kelisimine» qol qoıdy.

Kelisim eki el arasyndaǵy qorǵanys salasy boıynsha yntymaqtastyqty damytýǵa jáne kez kelgen shabýylǵa birlesip toıtarys berýge baǵyttalǵan. Kelisim talaptary boıynsha, eki eldiń bireýine jasalǵan shabýyl eki memleketke de jasalǵan bolyp esepteledi.

SPA-nyń habarlaýynsha, Pákistan premer-mınıstri Shahbez Sharıf el astanasyna 17 qyrkúıek kúni kelgen.

Pákistannyń Associated Press of Pakistan (APP) resmı aqparat agenttiginiń habarlaýynsha, baýyrlas eki el arasyndaǵy yntymaqtastyqqa jáne ony damytý múmkindikterine arnalǵan kezdesý barysynda keıingi kezdegi óńirde bolyp jatqan oqıǵalar da talqylandy.

Osyǵan deıin Qazaqstan men Pákistan arasyndaǵy saýda 2,5 ese óskeni týraly habarladyq.