Saýd Arabııasy men AQSh Sýdanǵa soǵysty toqtatatyn úsh tarmaqty beıbit jospar usyndy

ASTANA. KAZINFORM — Saýd Arabııasy men Amerıka Qurama Shtattary Sýdanǵa qaqtyǵysty beıbit jolmen retteýge baǵyttalǵan jospardy usyndy. Úsh tarmaqtan turatyn bul jospar Sýdan qarýly kúshteriniń bas qolbasshysy Abdel Fattah ál-Býrhanǵa jetkizildi. Bul týraly Sudan Tribune basylymyna silteme jasap, Kazinform agenttiginiń menshikti tilshisi habarlady.

Sudan Tribune málimetinshe, usynylǵan jospar soǵysty toqtatýǵa, gýmanıtarlyq kómek kórsetýdi qamtamasyz etýge jáne bılikti azamattyq kúshterge berýge baǵyttalǵan.

Buǵan deıin Abdel Fattah ál-Býrhan Er-Rııadta Saýd Arabııasynyń taq murageri, hanzada Muhammed bın Salmanmen kezdesý ótkizgen. Keıin ol AQSh prezıdentiniń Afrıka jónindegi aǵa keńesshisi Massad Býlospen de júzdesti. Basylymnyń habarlaýynsha, ál-Býrhan usynylǵan jospardy jan-jaqty zerdeleý úshin qosymsha ýaqyt suraǵan.

Derekkózderdiń aıtýynsha, Darfýr men Kordofan aımaqtaryndaǵy gýmanıtarlyq daǵdarystyń ýshyǵýyn eskere otyryp, Donald Tramp ákimshiligi taraptardyń biri gýmanıtarlyq bitim men atysty toqtatý usynysynan bas tartqan jaǵdaıda, balama nusqalar men qysym sharalaryn qarastyrýy múmkin.

Bıylǵy jyldyń qarasha aıynda Donald Tramp Sýdandaǵy soǵysty toqtatý baǵytynda jumys isteıtinin málimdegen bolatyn.

Aıta keteıik, sońǵy eki aıda qaýipsizdik jaǵdaıynyń kúrt nasharlaýyna baılanysty Sýdanda sońǵy eki aıda 50 myńnan astam adam úıin tastap ketýge májbúr boldy.