Saýd Arabııasy Mekkede aýqymdy megajobany iske qosty

ASTANA. KAZINFORM — Saýd Arabııasy Mekkedegi álemdegi eń úlken meshit — ál-Haram meshitine irgeles jatqan 12 mıllıon sharshy metr aýmaqty ıgerýdi kózdeıtin «Korol Salmannyń qaqpasy» atty aýqymdy jobany iske qosatynyn málimdedi, dep habarlaıdy Kazinform tilshisi.

Saýd Arabııasynyń jańalyqtar agenttiginiń habarlaýynsha, eldiń taq murageri ári Premer-mınıstri Mýhammed ben Salman ben Abdýlazız ál-Saýd «Korol Salmannyń qaqpasy» jobasynyń bastalǵanyn jarııalady. Bul joba ekonomıkany ártaraptandyrýdy kózdeıtin «Vision 2030» ulttyq baǵdarlamasy aıasynda júzege asyrylyp jatyr.

— «Korol Salmannyń qaqpasy» jobasy ál-Haram meshitiniń janynda strategııalyq mańyzy bar jerde ornalasqan. Bul kópfýnktsıonaldy keshen Mekke qalasynyń ınfraqurylymyn sapaly jańa deńgeıge kóterýdi, ony jahandyq deńgeıdegi qala úlgisine aınaldyrýdy maqsat etedi, — delingen Saýd Arabııasy jańalyqtar agenttiginiń habarlamasynda.

2036 jylǵa qaraı keshen 900 000 adamdy qabyldaı alatyn bolady. Ol jabyq namazhanalar men ashyq aýlalardan, turǵyn úılerden, mádenı keńistikter men qyzmet kórsetý nysandarynan turady. Joba aıasynda 19 000 sharshy metr tarıhı jáne mádenı aýmaq qaıta jańǵyrtylyp, 300 000 jumys ornyn ashý josparlanyp otyr.

Budan buryn Saýd Arabııasy Iemen úkimetine shamamen 368 mln dollar, al Palestınaǵa 90 mıllıon dollar kóleminde kómek kórsetetini habarlandy.