Saýd Arabııasy kóne órkenıetterdiń murasyn zertteıdi
ASTANA. KAZINFORM — Saýd Arabııasy Ál-Ýle men Haıbarda 2026-2027 jyldarǵa arnalǵan arheologııalyq zertteý maýsymynyń bastalǵanyn jarııalady, dep habarlaıdy Kazinform Saudi Press Agency agenttigine silteme jasap.
Jańa zertteý maýsymynda mamandar Arab túbegindegi adamzattyń alǵashqy izderin, ejelgi patshalyqtar men oazıster mańyndaǵy qonystardyń tarıhyn zerdeleıdi. Sondaı-aq saýda jáne qajylyq joldaryn, sýmen jabdyqtaý júıesi men kóne qoǵamdardyń kúndelikti turmys-tirshiligi zertteledi.
Bul zertteý ejelgi órkenıetterdi tanyp bilýge, mádenı murany saqtaýǵa jáne halyqaralyq ǵylymı baılanystardy nyǵaıtýǵa baǵyttalǵan.
Onyń negizgi baǵyty óńirdiń jazba murasyn zerdeleýge arnalady. Ál-Ýle aýmaǵynan búginge deıin 25 myńnan astam kóne jazba tabylǵan. Olar Arabııa túbeginiń soltústik-batysyndaǵy tarıhty, tilderdi jáne mádenı baılanystardy tereńirek tanýǵa jol ashady. Budan bólek mamandar ejelgi qysh buıymdardy, janýar súıekterin jáne oazısterdegi sý júıelerin zerttep jatyr.
Baǵdarlama aıasynda saýdııalyq mamandar daıarlanyp, stýdentter dalalyq jáne zerthanalyq zertteýlerge qatysady. Sonymen qatar halyqaralyq ǵylymı mekemelermen yntymaqtastyq ornatý kózdelgen. Bul bastama ulttyq murany saqtaýǵa jáne Saýd Arabııasynyń mádenıetin shetelde keńinen tanytýǵa baǵyttalǵan «Saudi Vision 2030» strategııasynyń maqsattaryna saı keledi.
Buǵan deıin Saýd Arabııasyndaǵy ańshylyq kórmesinde 5 myńnan astam ónim tanystyrylatyny habarlanǵan bolatyn.
