Saýd Arabııasy Qytaıǵa munaı jetkizilimin eki ese qysqartady
ASTANA. KAZINFORM – Saýd Arabııasy Qytaıǵa munaı jetkizilimin eki ese qysqartpaq, dep habarlaıdy Kazinform menshikti tilshisi.
Jetkizilimniń qysqarýy munaı baǵasynyń rekordtyq deńgeıge jetýi jáne jetkizý tizbekterindegi irkilister aıasynda oryn alyp otyr.
Saýd Arabııasy mamyr aıynda óziniń negizgi satyp alýshysy Qytaıǵa jetkiziletin munaı kólemin eki ese azaıtýdy josparlap otyr.
Bloomberg agenttiginiń málimetinshe, aǵymdaǵy jyldyń mamyr aıynda Qytaıǵa jetkiziletin munaı kólemi 20 mln barrel bolady. Salystyrý úshin, sáýir aıynda koroldik 40 mln barrel munaı jóneltken.
Jetkizilimniń qysqarýy Saýd Arabııasynyń ulttyq munaı kompanııasy Azııa naryǵy úshin baǵalardy rekordtyq deńgeıge kótergennen keıin oryn alǵan. Bul jaǵdaı Ormýz buǵazyndaǵy ahýalmen baılanysty.
Buǵan deıin Frantsııa men Ulybrıtanııa Ormýz buǵazynda áskerı-teńiz mıssııasyn qurý máselesin talqylaıtyny habarlanǵan bolatyn.
Sondaı-aq Saýd Arabııasy eldegi birqatar energetıkalyq nysandardyń jumysy ýaqytsha toqtaýyna baılanysty munaı óndirý kólemin táýligine 600 myń barrelge qysqartqan.
