Saýd Arabııasy qajylyq kezinde aqyldy tehnologııalar engizdi
ASTANA. KAZINFORM – Koroldiktiń memlekettik qurylymdary qajylardyń qaýipsiz jáne jaıly júrýin qamtamasyz etý úshin jasandy ıntellekt, derekterdi taldaý jáne zamanaýı tehnologııalardy paıdalanyp jatyr, dep habarlaıdy Saudi Press Agency.
Saýd Arabııasyna kirý oryndary — áýejaılar, teńiz porttary jáne qurlyq shekaralarynda 136-dan astam tildi qoldaıtyn lezde aýdarma júıeleri engizildi. Bul qajylarǵa shekara protsedýralaryn jedeldetýge, jol tabýǵa jáne el boıynsha qozǵalýǵa kómektesedi.
Qasıetti jerlerde adamdar men kólikterdiń qozǵalysyn úılestirý úshin aqyldy tehnologııalar paıdalanylady. Naqty ýaqyt rejımindegi derekterdi baqylaý jáne derekterdi taldaý júıeleri qajylar kóp shoǵyrlanǵan oryndarda jaǵdaıdy jyldam baqylaýǵa jáne qaýipsizdik deńgeıin arttyrýǵa múmkindik beredi.
Densaýlyq saqtaý júıesinde dárigerlerge patsıentter týraly aqparatqa jyldam qol jetkizý, onlaın konsýltatsııalar júrgizý jáne dári-dármekterdi berýdi baqylaýdy qamtamasyz etý úshin tsıfrlyq qyzmetterdi belsendi túrde paıdalanyp jatyr. Jasandy ıntellekt tehnologııalary adamdaǵy aýrý belgilerin taldaý jáne aldyn ala dıagnostıka júrgizý úshin de qoldanylady.
Nusuk qosymshasy qajylar úshin negizgi tsıfrlyq quraldardyń birine aınaldy. Ol ınteraktıvti kartalar men navıgatsııadan bastap kólik jáne qurbandyq uıymdastyrýǵa deıin 130-dan astam qyzmetti biriktiredi. Qazirgi ýaqytta qosymshanyń búkil álem boıynsha 51 mln-nan astam paıdalanýshysy bar.
Múmkindigi shekteýli adamdar úshin arnaıy tsıfrlyq qyzmetter, sonyń ishinde sýrdoaýdarma jáne vızýaldy qoldaý quraldary qoljetimdi.
Osyǵan deıin Saýd Arabııasy qajylyq maýsymy kezinde ekologııalyq júktemeni azaıtý sharalaryn kúsheıtip jatqanyn jazdyq.
Aıta keteıik, bıyl 4000 otandasymyz qajylyq paryzyn óteıdi.
