Saýd Arabııasy qajylyq erejelerin buzǵandarǵa qatań aıyppuldar engizdi

ASTANA. KAZINFORM — Saýd Arabııasy bıligi qajylyq erejelerin qatań saqtaý qajettigin taǵy da eske salyp, ereje buzýshylarǵa qosymsha aıyppuldar engizdi, dep jazady Kabar.

Bul týraly Al Jazeera agenttigi Koroldiktiń Іshki ister mınıstrligine silteme jasaı otyryp habarlady.

Búginnen bastap, Zýl-kada (red. — musylman kúntizbesindegi 11-aı) aıynyń 1-inen Zýl-hıdja (red. — musylman kúntizbesindegi 12-aı) aıynyń 14-ine deıin Mekkege jáne basqa da qasıetti jerlerge zańsyz kirý áreketterine qatysty kúsheıtilgen baqylaý jáne jaza sharalary kúshine enedi.

Negizgi sharalar men aıyppuldar:

— Qajylyqqa arnalmaǵan vızalardyń ıelerin qasıetti jerlerge tasymaldaǵandarǵa 100 000 saýd rıalyna deıin (shamamen 26 600 AQSh dollary) aıyppul salynady;

— Eger ereje buzýshylyq dáleldense, kólik quraly ereje buzýshyǵa nemese onyń sybaılasyna tıesili bolsa, tárkilenýi múmkin;

— Resmı ruqsatsyz qajylyq jasaýǵa árekettengenderge 20 000 rıalǵa deıin (shamamen 5 332 AQSh dollary) aıyppul salynady;

— Vızalyq rejımdi buzýshylar deportatsııalanyp, Saýd Arabııasyna 10 jylǵa deıin kirýge tyıym salynady.

Іshki ister mınıstrligi bul sharalar qajylyqqa arnaıy ruqsaty joq Mekkege kirýge nemese onda tyıym salynǵan kezeńde qalýǵa árekettenetin kez kelgen vıza túriniń ıelerine qatysty ekenin atap ótti.

Saýd Arabııasy bıligi barlyq azamat pen rezıdentti qajylyq erejelerin qatań saqtaýǵa jáne dinı rásimder kezinde qajylardyń qaýipsizdigi, tártibi men jaılylyǵyn qamtamasyz etý úshin ereje buzýshylyqtar týraly habarlaýǵa shaqyrdy.

Jaqynda Qazaqstan musylmandary dinı basqarmasy málimdeme jasady. Oǵan sáıkes Saýd Arabııasy bıyl zańsyz qajylyq jasaǵan adamdar men zańsyz qajylyqty uıymdastyrǵandarǵa qomaqty aıyppul salady.