Saýd Arabııasy hýsıttermen qaqtyǵys ýshyqqan tusta áskerı daıyndyǵyn kúsheıtti
ASTANA. KAZINFORM — Saýd Arabııasy men Iemenniń «Ańsar Alla» qozǵalysy arasyndaǵy qaqtyǵys ýshyǵyp barady, eki jaq birneshe apta boıy bir-birine zymyran atyp, dronmen jáne áýeden shabýyldap otyr, dep habarlaıdy Kazinform agenttiginiń Taıaý Shyǵystaǵy menshikti tilshisi.
Saýd Arabııasynyń Bas múftıi sheıh Saleh bın Faýzan ál-Faýzan shekaradaǵy áskerlerdi jáne Ár-Rııad bastaǵan koalıtsııa kúshterin hýsıttermen kúresýge daıyn bolýǵa shaqyrdy.
Málimdemeni beısenbi kúni keshke Saýd baspa agenttigi jarııalady.
— Osynaý uly memleketti qorǵaý, onyń shekaralaryn kúzetý, agressııany toıtarý jáne onyń aýmaǵyna bir qarys suǵynyp kirýge tyrysqan kez kelgen adamdy jazalaý — uly mindet ári jan pıda etýge turarlyq eń qurmetti isterdiń biri, — delingen málimdemede.
Múftı áskerılerdi daıyn turýǵa, bılik pen dala komandırleriniń buıryqtaryna baǵynýǵa jáne tabandylyq pen qyraǵylyq kórsetýge shaqyrdy.
Ol Iemenniń búkil aýmaǵynda eldiń Ár-Rııad qoldaıtyn, halyqaralyq deńgeıde moıyndalǵan úkimetiniń bıligin qalpyna keltirýdi kezek kúttirmeıtin mindettiń biri dep atady.
Bul málimdeme Saýd Arabııasy men hýsıtter arasyndaǵy jaǵdaı jańa ýshyqqan tusta jasalyp otyr. Beısenbi kúni Ár-Rııad bastaǵan koalıtsııa Saýd Arabııasynyń Taıf jáne ıAnbý qalalaryna atylǵan alty ballıstıkalyq zymyrandy joıǵanyn habarlady.
Keıinirek Iemen hýsıtteriniń «Ańsar Allah» qozǵalysy Saýd Arabııasynyń birneshe áskerı nysanyna shabýyl jasaǵanyn moıyndady. Hýsıtter shabýyldar Djızan provıntsııasynyń Ál-Týval aımaǵyndaǵy nysandardy, sondaı-aq Ál-Dagarır áskerı lagerindegi zymyran ushyrý qondyrǵylaryn nysanaǵa alǵanyn málimdedi. Saýd tarapy bul aqparatty rastaǵan joq.
Sonymen qatar, Iemen úkimetiniń ókili Moha jáne Taız aýdandaryndaǵy hýsıtterdiń pozıtsııalaryna birneshe shabýyl jasalǵanyn habarlady. Operatsııanyń egjeı-tegjeıi, qurbandar sany týraly málimetter jarııalanbady.
Kýveıt pen Bahreın syrtqy ister mınıstrlikteri Saýd Arabııasyna jasalǵan zymyran shabýyldaryn aıyptady. Parsy shyǵanaǵy arab memleketteri yntymaqtastyq keńesiniń bas hatshysy Djasem Mohamed ál-Býdaıvı Ár-Rııad óz aýmaǵyn qorǵaý úshin iske asyrýy múmkin sharalardy tolyq qoldaıtynyn bildirdi.
Sońǵy aptalarda hýsıtter Saýd Arabııasyna birneshe márte zymyranmen jáne dronmen shabýyl jasady, al Saýd Arabııasy Iemen aýmaǵyna áýeden soqqy berdi. Jaǵdaıǵa baılanysty Saýd Arabııasy, Túrkııa jáne Pákistan shuǵyl áskerı kelissóz ótkizedi.
