Saýd Arabııasy Gollıvýdqa fılmdi túsirý shyǵyndarynyń 60%-yn qaıtarýdy usynady
ASTANA. KAZINFORM — Saýd Arabııasy Gollıvýdty fılmder men serıaldar óndirisine arnalǵan iri tólemder arqyly tartýdy kózdep otyr. Koroldik bılik el aýmaǵynda túsirilgen jobalarǵa ketken shyǵynnyń 60%-yna deıin prodıýserlerge qaıtarýǵa daıyn, dep habarlaıdy Bild.
Salystyrý úshin aıtsaq, Germanııada bir fılmge beriletin memlekettik qoldaýdyń eń joǵary kólemi 25 mln eýroǵa deıin jetedi. Al Saýd Arabııasy aýmaǵynda bıýdjeti 100 mln dollar bolatyn joba túsirilse, prodıýserler shyǵynnyń 60 mln dollaryna deıin qaıtara alady.
Kınoındýstrııany qoldaýǵa arnalǵan jańa baǵdarlama týraly Saýd Arabııasy ókilderi Cannes Film Festival kezinde málimdedi. Basylym dereginshe, shyǵyndardy óteý kólemi memlekettik kınoqarjylandyrý júıesin damytyp jatqan elder arasyndaǵy eń joǵary kórsetkishterdiń birine aınalǵan.
Saýd Arabııasy elge gollıvýdtyq rejısserlerdi, prodıýserlerdi jáne iri halyqaralyq stýdııalardy tartýdy kózdep otyr. Bılik kıno jáne oıyn-saýyq ındýstrııasyn taq murageri Muhammed bın Salman júzege asyryp jatqan «Vision-2030» baǵdarlamasy aıasynda damytýdy josparlaǵan.
Sarapshylardyń baǵalaýynsha, jańa sharttar álemdik kınoóndiris naryǵyna eleýli áser etýi múmkin. Germanııanyń Federaldyq kınoqarjylandyrý agenttiginiń basshysy Kırsten Nıhaýs eýropalyq elder iri jobalardyń bir bóliginen aıyrylyp qalý qaýpi bar ekenin aıtty.
— Іri fılm óndirýshiler Eýropadan ketýi nemese múlde kelmeýi múmkin, — dedi ol.
Sońǵy jyldary Saýd Arabııasy sportqa, týrızmge, mýzyka men kınoǵa belsendi ınvestıtsııa quıyp keledi. Osy arqyly el halyqaralyq arenadaǵy ashyq ımıdjin qalyptastyryp, ekonomıkanyń munaı tabysyna táýeldiligin azaıtýdy maqsat etip otyr.
Sonymen qatar, quqyq qorǵaý uıymdary koroldikti adam quqyqtaryna qatysty jaǵdaı úshin synaýyn jalǵastyrdy. Batys medıasynda ólim jazasynyń kóbeıýi týraly máseleler jıi kóteriledi.
Aıta keteıik, Gollıvýd juldyzdary Paramount pen Warner Bros-tyń birigýine qarsy shyqty.
