Saýd Arabııasy Gazadan palestınalyqtardy yǵystyrý áreketinen bas tartady
ASTANA. KAZINFORM – Er-Rııad Palestına memleketi qurylmaı Izraılmen qatynas ornatpaıtynyn málimdedi, dep habarlaıdy Kazinform agenttiginiń menshikti tilshisi.
Saýd Arabııasy Gaza sektorynan palestınalyqtardy yǵystyrýǵa baǵyttalǵan kez kelgen áreketten bas tartatynyn atap ótip, Palestına memleketi qurylmaı Izraılmen qatynas ornatpaıtynyn ashyq bildirdi.
Mundaı málimdeme seısenbi kúni, AQSh prezıdenti Donald Tramp Qurama Shtattar Gaza sektoryn baqylaýǵa alatynyn jáne palestınalyqtardy basqa orynǵa qonystandyratynyn aıtqannan keıin jasaldy. Amerıka basshysy atalǵan málimdemeni bul kúnderi AQSh-ta saparmen júrgen Izraıl premer-mınıstri Bınıamın Netanıahýmen kezdesýden keıin Aq úıde ótken baspasóz máslıhaty barysynda jasady.
— Tramp Saýd Arabııasy Izraılmen qatynasyn qalypqa keltirý úshin aldyn ala shart retinde Palestına memleketin qurýdy talap etpeıdi dep málimdedi. Alaıda, Er-Rııad jarııa málimdemelerinde ustanymyn naqty bildirip keledi, — dep jazady The Times of Israel.
AQSh prezıdenti Donald Tramppen birlesken baspasóz máslıhaty barysynda premer-mınıstr Netanıahý óziniń paıymynsha «Izraıl men Saýd Arabııasy arasynda beıbitshilik ornaýy múmkin ekenin» basa aıtty.
Saýd Arabııasy Syrtqy ister mınıstrliginiń málimdemesinde Er-Rııad astanasy Shyǵys Ierýsalım bolatyn táýelsiz Palestına memleketi qurylmaı Izraılmen dıplomatııalyq qatynas ornatylmaıtyny aıryqsha atap ótilgen.
— Syrtqy ister mınıstrligi Saýd Arabııasynyń Palestına memleketin qurýǵa qatysty ustanymy nyq ári myzǵymas ekenin rastaıdy. Asa mártebeli taq murageri jáne premer-mınıstr Muhammed ben Salman ben Ábdelazız ál-Saýd bul ustanymdy qýattady, - delingen vedomstvonyń málimdemesinde.
Koroldik málimdemesinde Saýd Arabııasynyń ustanymy qaıta qaraýǵa nemese saıası saýdaǵa salýǵa jatpaıtyny erekshe atalyp ótilgen. Halyqarylyq qararlarǵa sáıkes Palestına halqynyń zańdy quqyqtary tolyq saqtalmaı ádil jáne uzaqmerzimdi beıbitshilik múmkin emestigi de aıtylǵan.
— Saýd Arabııasy bul ustanymdy AQSh-tyń burynǵy da, qazirgi de ákimshiligine naqty jetkizdi, - delingen málimdemede.
Buǵan deıin oqyrman nazaryna shyǵystanýshy shyǵystanýshy Janat Momynqulovtyń Tramptyń Gaza sektoryna qatysty málimdemesine oraı bergen suhbatyn usynǵan edik.