Saýd Arabııasy eldiń shyǵysynda taǵy bir drondy qaǵyp túsirgenin málimdedi

ASTANA. KAZINFORM — Iemenniń zańdy úkimetin qoldaıtyn Saýd Arabııasy bastaǵan arab koalıtsııasy eldiń shyǵys bóliginde taǵy bir ushqyshsyz ushý apparatynyń (dron) jolyn keskenin habarlady, dep jazady Anadoly.

bespılotnıkı
Foto: Anadolu

Koalıtsııa ókili, brıgadalyq general Týrkı ál-Malıkı amerıkalyq X áleýmettik jelisindegi paraqshasynda taǵy bir dronnyń Saýd Arabııasynyń shyǵys aımaǵyna baǵyttalǵanyn málimdedi.

Ál-Malıkıdiń aıtýynsha, ushyrylǵan jeri belgisiz dron áýede qaǵyp túsirilip, joıylǵan.

Oqıǵa saldarynan qaza tapqandar men zardap shekkender bar-joǵy, sondaı-aq materıaldyq shyǵyn týraly aqparat berilgen joq.

Buǵan deıin koalıtsııa ókili eldiń shyǵys bóligine baǵyttalǵan eki dronnyń jáne Saýd Arabııasynyń astanasy Er-Rııadqa qaraı ushyrylǵan hýsıtterdiń eki ballıstıkalyq zymyranynyń joly kesilgenin habarlaǵan edi.

Iemende 2014 jyldyń qyrkúıeginde Iran qoldaıtyn hýsıtter el astanasy Sana men birqatar provıntsııany baqylaýyna alǵannan keıin bastalǵan azamattyq soǵys áli jalǵasyp jatyr.

2015 jyldyń naýryzynan beri Saýd Arabııasy bastaǵan arab koalıtsııasy halyqaralyq qaýymdastyq moıyndaǵan Iemen úkimetine qoldaý kórsetip keledi.

Sońǵy ýaqytta Iemendegi úkimet kúshteri men hýsıtter arasyndaǵy qaqtyǵystar jıilegen. Iran qoldaıtyn hýsıtter ózderine shabýyl jasalyp jatqanyn aıtyp, Saýd Arabııasyna ballıstıkalyq zymyrandar men drondar arqyly soqqy berip keledi.

Budan buryn hýsıtter Saýd Arabııasyndaǵy Er-Rııad áýejaıy men munaı qubyryna shabýyl jasalǵanyn málimdedi.