Saýd Arabııasy bastaǵan koalıtsııa Iemendegi hýsıtterdiń nysandaryna operatsııa júrgizdi
ASTANA. KAZINFORM – Saýd Arabııasy bastaǵan koalıtsııa Iemendegi hýsıtterdiń áskerı áleýetin nyǵaıtýǵa paıdalanylatyn mańyzdy resýrstardy joıý maqsatynda áskerı operatsııa ótkizdi. Ásirese ballıstıkalyq zymyrandar men ushqyshsyz ushý apparattarynyń múmkindikterin qoldaıtyn nysandarǵa basymdyq berilgen, dep habarlaıdy Anadolu agenttigi.
Koalıtsııa ókili Túrkı ál-Malıkıdiń málimdeýinshe, operatsııa jeksenbi kúni tańerteń Iemen men Saýd Arabııasyndaǵy beıbit turǵyndar men azamattyq ınfraqurylymǵa hýsıtter tarapynan jasalǵan shabýyldar jalǵasqannan keıin ótkizilgen.
Onyń aıtýynsha, koalıtsııanyń birikken kúshter qolbasshylyǵy hýsıtterdiń áskerı áreketterin qoldaý jáne jaýyngerlik múmkindikterin arttyrý úshin mańyzdy resýrstardy turaqty paıdalanyp kele jatqanyn baqylaǵan. Bul, ásirese, ballıstıkalyq zymyrandar men drondarǵa qatysty.
Ál-Malıkı hýsıtterdiń shabýyldary beıbit turǵyndardyń ómiri men azamattyq ınfraqurylymnyń qaýipsizdigine tikeleı qater tóndiretinin atap ótti.
Operatsııanyń maqsaty – toptyń qaıtalanǵan shabýyldar jasaýyna, Saýd Arabııasy men Iemenniń, sondaı-aq Qyzyl teńizdiń ońtústigindegi keme qatynasy joldarynyń qaýipsizdigine qater tóndirýine múmkindik beretin resýrstardy zalalsyzdandyrý.
Koalıtsııa málimdemesinde shabýyl jasalǵan oryndar men zalalsyzdandyrylǵan resýrstardyń naqty túri kórsetilmegen. Qaza tapqandar men materıaldyq shyǵyn týraly da aqparat berilmedi. Hýsıtter ázirge bul málimdemege túsinikteme jasaǵan joq.
5 qazannan bastap Iemen úkimetiniń kúshteri hýsıtterdiń baqylaýyndaǵy memlekettik mekemelerdi qaıtaryp, el astanasy Sana qalasyn qaıta alý maqsatynda «Iemen tańy» operatsııasyn júrgizip keledi.
BUU esepterine sáıkes, úkimet kúshteri men hýsıtter arasyndaǵy áskerı qaqtyǵys shilde aıynda qaıta órship, myńdaǵan adam qaza taýyp, jaralanǵan. 250 myńnan astam turǵyn baspanasyn tastap ketýge májbúr bolǵan.
Qaqtyǵystyń kúsheıýi 2022 jylǵy sáýirden beri saqtalǵan salystyrmaly tynyshtyq kezeńin aıaqtady. Urys pen halyqtyń jappaı qonys aýdarýyna baılanysty gýmanıtarlyq daǵdarys ta tereńdeı túsken.
Iemende hýsıtter 2014 jylǵy qyrkúıekte el astanasy Sana men birqatar provıntsııany basyp alǵannan beri soǵys júrip jatyr. 2015 jylǵy naýryzda Saýd Arabııasy bastaǵan koalıtsııa halyqaralyq deńgeıde moıyndalǵan úkimetti qoldaý úshin qaqtyǵysqa aralasqan.
Eske sala ketspek, hýsıtter Er-Rııad áýejaıyna shabýyl jasap, saldarynan 12 adam qaza taýyp, 300-den astam adam jaralanǵan edi.
