Saýd Arabııasy 10 aqpannan bastap qajylar úshin mindetti vaktsınatsııa engizedi
ASTANA. KAZINFORM - Air Astana áýe kompanııasy jolaýshylarǵa 10 aqpannan bastap Saýd Arabııasyna kirý úshin menıngokokk ınfektsııasyna qarsy vaktsınatsııa qajet ekenin eskertti.

10 aqpannan bastap ýmra men qajylyqqa barýǵa nıetti 1 jastan asqan barlyq jolaýshynyń menıngokokk ınfektsııasyna qarsy egý sertıfıkaty bolýy kerek.
- Menıngokokqa qarsy tórt valentti (ACYW-135) polısaharıd vaktsına keıingi 3 jyl ishinde jáne Jıdda, Mádınaǵa kelerden keminde 10 kún buryn salynǵan bolýy kerek. Nemese menıngokokkqa qarsy tórt valentti (ACYW-135) konıýgattyq vaktsına keıingi 5 jyl ishinde jáne qalaǵa kelerden keminde 10 kún buryn salynǵan bolýy kerek, - delingen habarlamada.
Qosymsha aqparatty Saýd Arabııasy Densaýlyq saqtaý mınıstrliginiń resmı saıtynan taba alasyz.
Eske salsaq, Densaýlyq saqtaý mınıstri Bas múftımen donorlyq jáne vaktsınatsııalaý máselesin talqylaǵan bolatyn.