Saýatty jazylǵan oqýlyqtardy nashar oqýlyqtardyń sapasymen qatar qoıýdy doǵarý kerek - mınıstr B. Jumaǵulov
ASTANA. 22 jeltoqsan. QazAqparat /Jasulan Amanbaıuly/ - Biz jańa býyndy oqýlyqtardy shyǵardyq, olardyń deni - sapaly jáne jaqsy qurastyrylǵan. Sondyqtan bilikti avtorlardy jáne olardyń eńbekterin basqalarmen qatar qoıyp, olardyń sapasyzdyǵy jóninde sóz qozǵaý durys emes.
Keshe, 21 jeltoqsan kúni Astanada ótken Oqýlyqtar men oqý-ádistemelik keshender saraptamasynyń nátıjelerin qarastyrý jónindegi respýblıkalyq keńestiń birinshi otyrysynda Bilim jáne ǵylym mınıstri Baqytjan Jumaǵulov osylaı aıtty.
Mınıstrdiń aıtýynsha, búginderi Qazaqstanda múldem jańa ári sapasy joǵary oqý materıalynyń bazasy qalyptasqan. B. Jumaǵulov saýatty jazylǵan oqýlyqtardy Qazaqstanda bar barlyq oqýlyqtardyń sapasymen qatar qoıýdy doǵarý kerektigin aıtty.
«Men bizdiń oqýlyqtarda bar keleńsiz jaıttardy qozǵap otyrmyn. Máselen, áriptik qateler, ulttyq qalybymyzǵa saı emes dúnıelerdi jáne obektilerdiń geografııalyq ornalasýyn baǵamdamaı syrttan materıal engizý, kitaptyń sapasyzdyǵyna qatysty syndardy ary qaraı sanamalaı berýge bolady. Kelisemin, bunyń barlyǵy ókinishke oraı ushyrasyp jatyr. Alaıda qyzmetin óte jaqsy jasap júrgen tutas avtorlar men baspagerlerdiń býynyn syzyp tastaý adaldyqqa jatpas. Olarǵa, kerisinshe, qoldaý kórsetýge tıispiz», - dep atap kórsetti ol.
Keńes otyrysynda belgili bolǵanyndaı, keńes músheleri 5 kún ishinde mınıstrliktiń taldaýynan ótken 900-den astam jańadan basylǵan mektep oqýlyqtaryn qarastyrady. Jalpy 1997-2007 jyldar aralyǵynda Qazaqstannyń mekteptik bilim berý júıesinde, 1-11 deıingi synyptar arasynda qazaq, orys, ózbek, uıǵyr tilderinde daıyndalǵan 714 atalym oqýlyqtar men 1717 atalym oqý-ádistemelik quraldar oqý protsesine engizilgen.
Bilim jáne ǵylym mınıstri Baqytjan Jumaǵulovtyń oqýlyqtardy ázirleý, saraptaý jáne basyp shyǵarý jónindegi jumystardy júıelendirý máselesi boıynsha ótkizgen keńeske oqý ádebıetterine saraptama jasaıtyn mamandar, elimizdiń barlyq óńirlerinen kelgen ádiskerler men pedagogtar qatysty.
