Saýatty aqparat memleket múddesin qorǵaıdy - «QazMunaıGaz» Ulttyq kompanııasy
ASTANA. 16 qarasha. QazAqparat - Almatyda «QazMunaıGaz» Ulttyq kompanııasy «Qazaqstan» baspasóz klýbymen birlesip, buqaralyq aqparat quraldarynyń qazaqstandyq naryqty damytý máseleleri boıynsha jyl saıyn ótkiziletin medıa quryltaıy aıasynda memlekettik tilde shyǵatyn BAQ-tardaǵy ekonomıka jáne ónerkásip taqyrybyn damytýǵa arnalǵan «dóńgelek ústel» ótkizdi, dep habarlaıdy «QazMunaıGaz» Ulttyq kompanııasynyń baspasóz qyzmeti.
Arnaıy jıynǵa «QazMunaıGaz» UK AQ Basqarma tóraǵasynyń orynbasary - atqarýshy dırektor Bolat Palymbetov, respýblıkalyq jáne aımaqtyq gazet, jýrnaldardyń bas redaktorlary men tele-radıo salasynyń jetekshi jýrnalısteri, ál-Farabı atyndaǵy QazUÝ-niń jýrnalıstıka fakýltetiniń oqytýshylary men mass-medıa salasynyń basqa da sarapshylary qatysty. Elimizdiń aqparat salasyndaǵy ózekti máselelerdi ortaǵa salǵan mamandar qazaq tildi buqaralyq aqparat quraldarynyń qazirgi jaı-kúıi, ony ári qaraı damytý úshin qandaı qadamdar jasalýy kerektigi jónindegi óz usynystarymen bólisti. «Ekonomıka jáne ónerkásip taqyrybyna jazatyn jýrnalısterdiń biliktiligin arttyrý joldary» jóninde baıandama jasaǵan «Aıqyn» gazetiniń bas redaktory Nurtóre Júsip: Bizdiń ulttyq jýrnalıstıkanyń bir ereksheligi - aǵartýshylyq jáne memleketshildik sıpatynda. Qazaqstanda júrgizilgen naryqtyq refor-malardyń eń ótkir, eń aýyr kezeńderinde qazaq baspasózi halyqqa jubatý sózin aıta bildi. Qıyndyqtan shyǵýdyń joldaryn usyndy. Janashyr boldy. Tilekshi boldy. Sonyń arqasynda 90-jyldardaǵy taýqy-metterden el aman-esen ótti. Árıne, ekonomıka - qıyn taqyryp. Qıyn bolsa da qyzyq taqyryp. Óıtkeni ol - óndiris, ol - ómirdiń ózegi. Sondyqtan da qazirgi qazaq jýrnalısteri ony qyzyqty da uǵynyqty, qarapaıym da kórkem tilmen oqyrmandy sonyń qaınaǵan ortasynda júrgendeı baýrap alyp, elimizdiń ekonomıkalyq jańǵyrýyna sony serpilis ákeletindeı jaza bilýi kerek», - dep memlekettik kásiporyndardyń ulttyq baspa-sózben birlese jumys isteýge bet burýy aqparattyq qaýipsizdiktiń kepili ekenin basa aıtty. Odan keıin sóz alǵan «Qazaqstan» UTA bas dırektory Qaınar Oljaı «Qazaq telejýrnalıstıkasynda ekonomıka jáne ónerkásip taqyrybyn keńinen qozǵaýdyń ózekti máseleleri» boıynsha sóz qozǵap, telearnalarda jańalyq sıpatyndaǵy qysqa habarlar ǵana bolmasa, bul taqyryptyń jiligin shaǵyp, elge egjeı-tegjeıli túsindiretin saýatty baǵdarlamalar joq, kóbisi orys tilinen sátsiz aýdarylǵan ónim ekenin ashyna aıtty. Al qazaq tiliniń qoldanys aıasyn keńitý men aqparat almasýdaǵy asa mańyzdy baǵyttardyń biri - qazaq ınternetin damytý jáne onyń bolashaǵy jaıynda www.abai.kz .. qazaq saıtynyń úılestirýshisi Aıdos Sarym oı bólisti. «Dóńgelek ústelde» «Alash aınasy» gazetiniń bas redaktory Serik Janbolat, Atyraýda jaryq kóretin halyqaralyq «Altyn ǵasyr» gazetiniń bas redaktory Jumabaı Dospanov, «Shalqar» radıosynyń basshysy Kópen Ámirbek, sarapshy Rasýl Jumaly jáne basqalar jıynǵa ózek bolǵan - qazaq tildi buqaralyq aqparat quraldaryndaǵy ekonomıka jáne ónerkásip taqyrybyn jurtshylyqqa tolyq jetkizý jolyndaǵy negizgi túıinderge toqtalyp, óz usynys-pikirlerin aıtty.
Jınalǵandar, bul turǵyda óndiris salasyndaǵy aqparattyń ashyqtyǵy men halyqqa jetkizilýiniń qol jetimdiliginiń tómen deńgeıde ekenin basa kórsetti. Tipti, elimizde keıbir óndiris oshaqtarynyń jumysy týraly halyq úkimet músheleriniń arnaıy issaparlary barysynda, bolmasa áldebir qarjylyq tekserý kezinde ǵana qulaǵdar bolady. Ekinshiden, qazirgi kúni óndiris, ekonomıka salasy týraly saýatty kommentarıı beretin maman da joqtyń qasy.
BAQ basshylary men sarapshy mamandardyń aıtýy boıynsha osyndaı negizgi máselermen tanysyp-bilgen «QazMunaıGaz» UK AQ Basqarma tóraǵasynyń orynbasary - atqarýshy dırektor Bolat Palymbetov: - Árıne, bul alǵashqy kezdesýde bári birden sheshilmeıdi. Áli talaı kezdesemiz. Biz ekonomıka, bıznes, sonyń ishinde munaı-gaz salasy týraly qazaq tilindegi materıaldardyń sapasyn tek birlesip qana jaqsarta alamyz. Biz sizderdiń barlyq usynystaryńyzdy qaraýǵa ázirmiz. Ulttyq kompanııa qoǵam úshin qashan da ashyq, - dedi.
