Saýapty is jasaý úshin meshit salý mindetti emes - Ermekbaev
Shara barysynda «Ýaqyp» qaıyrymdylyq qory qamqorshylar keńesiniń tóraǵasy, mınıstr Nurlan Ermekbaev sóz sóılep, Qazaqstanda ıgilikti, saýapty ister jasaýǵa nıetti adamdardyń qatary kóbeıip kele jatqanyn basa aıtty.
«Din jolynda «saýapty is» jasaý úshin tek qana meshit salý mindetti emes. Qoǵam úshin paıdaly bolyp esepteletin kez-kelgen ıgilikti isti jasaýǵa bolady. Onyń ishinde mektepter, aýrýhanalar, jol salý, kópir salý sekildi qoǵamǵa paıdaly kez kelgen is saýapqa jatady. Qordyń jumysy atalǵan máseleni sheshýge baǵyttalǵan. Ol qaıyrymdylyq jasaý jolyndaǵy isterdi tıimdi júıege salýǵa úles qosady. Eń bastysy - bári ashyq jáne qoǵam úshin paıdaly bolýy tıis», - dedi Nurlan Ermekbaev.
Qordyń qarajaty dinı ǵımarattar men áleýmettik nysandardy salýǵa, dinı qyzmetkerler men kedeılerge, jumyssyzdar men múgedekterge qoldaý kórsetýge arnalǵan jobalardy iske asyrýǵa baǵyttalady.
N. Ermekbaevtyń aıtýynsha, mundaı mekemeler qaıyrymdylyq jasaý dástúrleri qalyptasqan kóptegen elderde keń taralǵan. «Vakf» Instıtýty musylman elderiniń halyqtary arasynda keńinen qoldanylady, sondaı-aq arnaıy qurylǵan «Vakf» mınıstrlikteri de jumys isteıdi. Atalǵan júıe qazirdiń ózinde Taıaý Shyǵystaǵy ıslam elderinde ǵana emes, sonymen qatar zaıyrly memleketterde de júzege asyrylýda. Mysaly, Reseı Federatsııasynyń keıbir óńirlerinde, Qyrǵyzstan men Túrkııada bar.
Іs-shara sońynda «Ýaqyp» Qory men «Al Sakr Fınans» AQ, «Astana Banki» AQ arasyndaǵy yntymaqtastyq týraly memorandýmdar bekitilip, metsenattar qaıyrymdylyq kómek kórsetýge ýaǵdalasty.
Aıta keterligi, sharaǵa QR Din isteri jáne azamattyq qoǵam mınıstrinen bólek Qazaqstannyń Bas múftıi, Qazaqstan musylmandary dinı basqarmasynyń tóraǵasy Erjan Malǵajyuly, memlekettik organdar men bıznes qaýymdastyqtardyń ókilderi qatysqan.
