Saýalnamany durys toltyrmaý qasaqana aýrý juqtyrýmen teń - Eljan Birtanov
«Karantınnen jaltaratyn adamdar joq desek te bolady. Erterekte kelgen borttar bar jáne biz patsıentter júgingen kezde kelýshilerdiń arasynan da vırýs juqtyrǵandaryn anyqtaımyz. Olar mindetti túrde oqshaýlaý rejimi engizilgenge deıin kelgen borttar. Mundaı jaǵdaıda ol adamdardy izdeýdi jalǵastyramyz. Mindetti túrde bir táýlikke oqshaýlaý barlyǵyn esepke alýǵa múmkindik beredi. Odan keıin olardy izdeýde problema bolmaıdy. Sondyqtan da búgingi kúni baılanysta bolǵandardyń 95 paıyzy oqshaýlanǵan jáne baqylaýymyzda tur»,- dedi mınıstr vedomstvonyń Facebook -tegi paraqshasynda «Densaýlyq mınıstrligi habarlaıdy...» degen aıdarmen jarııalanǵan vıdeoda.
Onyń atap ótýinshe, adamdar aýrý belgilerimen júgingen kezde dáriger odan mindetti túrde shetelge barǵan-barmaǵanyn suraıdy. Sondaı-aq ol elimizge kelýshilerdiń saýalnama toltyrýy mindetti ekendigin basa aıtty.
«Jaltarý, naqtyraq aıtsaq, saýalnamany durys toltyrmaý - karantınnen jaltarýmen teń. Mundaı tulǵalar aıyppul nemese tipti tutqynǵa alý arqyly jazalanýy múmkin. Eger adam aýrý bolsa jáne mundaı táýekeldi bile tura saýalnamany durys toltyrmasa nemese karantınnen jaltarsa, onda bul qasaqana aýrý juqtyrý bolyp sanalady jáne qylmystyq qýdalaýǵa ushyraıdy», - dedi Eljan Birtanov.