Saýalnamaǵa qatysqandardyń 97,64 paıyzy kandıdat N. Nazarbaevqa daýys bergendigin aıtty
ASTANA. QazAqparat - Júrgizilgen saýalnama qorytyndylary boıynsha suralǵandardyń 97,64%-y kandıdat N. Nazarbaevqa daýys bergenderin aıtty. Bul týraly Áleýmettik-saıası zertteýler ınstıtýtynyń dırektory Aıgúl Sádýaqasova málim etti.
«Búgin - Qazaqstan halqy úshin erekshe kún. Bizdiń Áleýmettik-saıası zertteý ınstıtýty saılaý naýqany barysynda kúni boıy saılaýshylardyń kimge daýys bergenin anyqtap, anonımdi saýalnama júrgizdi. Saýalnama qorytyndylary boıynsha suralǵandardyń 97,64 paıyzy kandıdat N. Nazarbaevqa daýys bergenderin aıtty. 0,77% respondent Á. Qusaıynovqa, 1,59%-y T. Syzdyqovqa daýys bergen. Búgingi Exit-poll aldyn ala málimetteri osyndaı», - dep atap ótti ol.
A. Sádýaqasovanyń aıtýynsha, Exit-poll metodıkasymen baılanysty áleýmettik zertteý ádisi saılaý ýchaskesinen daýys berip shyqqan saılaýshylarǵa negizdelgen. «Qazaqstannyń barlyq aımaqtary boıynsha bizdiń saýalnamaǵa 40 myń respondent qatysty. Saýalnama júrgizýge 350-den astam adam jumyldyryldy. Bir kún ishinde saýalnamanyń tórt tolqyny júrgizildi», - dedi ol.
