Saýalnamaǵa qatysqan 15-19 jas aralyǵyndaǵy qyzdardyń 17%-y júkti bolǵanyn aıtty - maman
«2018 jyly Birikken Ulttar Uıymynyń Qazaqstandaǵy Halyqtyń qonystaný salasyndaǵy qory jasóspirimderdiń reprodýktıvti densaýlyǵyna qatysty áleýmettik zertteý jumysyn júrgizgen. Saýalnamaǵa Qazaqstandaǵy 15-19 jas aralyǵyndaǵy 4 myńnan astam jasóspirim qatysqan. Saýalnama qorytyndysy boıynsha, jasóspirimderdiń úshten bir bóligi jynystyq qatynas turǵysynan belsendi ekeni anyqtalǵan. Osy belsendi toptyń 21%-y kámelettik jasqa tolmaı jatyp jynystyq qatynasqa túskeni anyqtaldy», - deıdi BUU-nyń Qazaqstandaǵy Halyqtyń qonystaný salasyndaǵy qorynyń qoǵammen qarym-qatynas boıynsha qyzmetkeri Dına Teltaeva.
Onyń aıtýynsha, saýalnamaǵa qatysqan qyzdardyń 17 paıyzy buryn júkti bolǵandaryn aıtqan.
«Saýalnamaǵa qatysqan qyzdardyń 17%-y buryn júkti bolǵandaryn aıtsa, onyń ishinde 40 paıyzy jasandy túsik jasatqan. 43%-ǵa jýyq jasóspirim birneshe adammen jynystyq qatynasta bolǵanyn aıtqan. Jalpy alǵanda, elimizdiń turǵyndary jynystyq qatynasqa on alty jarym jastan bastap túse bastaıdy», - deıdi ol.
Sondaı-aq, maman jasóspirimderdiń reprodýktıvti densaýlyǵyn jaqsartý úshin úsh nárse qajet ekenin aıtty.
«Birinshiden, mektep baǵdarlamasyna jynystyq saýat týraly pán engizý kerek. Ekinshiden, jasóspirimderge óz densaýlyǵyn qorǵaý maqsatynda emhanaǵa baryp, keńes alýǵa bolatyn medıtsınalyq qyzmet túrin engizý kerek. Jynystyq turǵyda belsendi jastarǵa qorǵanatyn zattardyń qoljetimdi bolýyn qamtamasyz etý kerek. Jynystyq qatynasqa túsetin bozbala men boıjetkende qorǵana alý quqyǵy bolýy kerek. Olaı etpegen jaǵdaıda jasóspirimderge jynystyq jolmen ártúrli aýrýlar juqtyryp alý qaýpi týady», - deıdi ol.
