Saýalnama: júrgizýshilerdiń 7 paıyzy qaýipsizdik beldigin jol polıtsııasyn kórgende ǵana taǵady
ASTANA. 27 aqpan. QazAqparat - ІІM Jol polıtsııasy komıteti óziniń resmı portalynda saýalnama ótkizip, onda qazaqstandyq júrgizýshilerdiń qaýipsizdik beldikterin paıdalanýǵa qatysty pikirlerin bildi.
Jol polıtsııasy komıtetiniń baspasóz qyzmetinen málim etkendeı, aqpan aıynda saýalnamaǵa 500-den astam qatysty. Júrgizýshilerdiń deni, naqty aıtqanda, 82 paıyzy kólikti basqarý kezinde qaýipsizdik beldikterin udaıy paıdalatyndyqtaryn aıtty. Saýalnamaǵa qatysqan qalǵandarynyń pikiri kelesideı boldy: 24 adam nemese 5 paıyzy qaýipsizdik beldikterin eldi mekennen tys jerge shyqqanda, ıaǵnı qalanyń syrtynda ǵana paıdalaný qajet dep sanaıdy, 35 adam nemese 7 paıyzy qaýipsizdik beldikterin jol polıtsııasy qyzmetkerlerin kórgen kezde ǵana paıdalanatyndyqtaryn moıyndady, 11 adam nemese 2 paıyzy kólik quralyn basqarý kezinde qaýipsizdik beldikterin óte sırek paıdalanatynyn aıtsa, qalǵan 24 júrgizýshi nemese 5 paıyzy qaýipsizdik beldikterin paıdalanýdy múldem qajet dep sanamaıdy.
Bul rette, Jol júrisi qaýipsizdigi jónindegi Eýropalyq Keńestiń (ETSC) derekteri boıynsha Eýropada júrgizýshilerdiń 88 paıyzy qaýipsizdik beldikterin paıdalanady eken. Eń jaýapty júrgizýshiler Frantsııa, Germanııa, Shvetsııa, Ulybrıtanııa jáne Nıderlandyda, onda azamattardyń 95 paıyzy qaýipsizdik beldikterin paıladanady.
Statıstıka boıynsha, qaýipsizdik beldikteri jol apaty jaǵdaıynda kóliktiń aldyńǵy ornynda otyrǵan jolaýshynyń ólimin eki esege, al artqy jaqtaotyrǵan jolaýshylardyń ólimin úsh esege tómendedi. Frontaldi soqtyǵysqan kezde kólik júrgizýshiniń ólimi eki-úsh esege, búıirden soqqan kezde - 1,8, al kólik quraly aýdarylǵan kezde ómirge degen qaýip 5 esege deıin azaıady.
«Ókinishke oraı, saýalnama kórsetkendeı, keıbir júrgizýshiler qaýipsizdik beldikterin paıdalanýdyń mańyzdylyǵyn eskermeıdi. Qaýipsizdik beldikterin paıdalaný jeke sheshimge baılanysty dep oılaıtyn júrgizýshilerge, kólik ishinde ujymdyq jaýapkershilik qaǵıdasy iske asyrylatynyn esterine salyp óteıin. Eger salonda otyrǵan bir jolaýshy qaýipsizdik beldigin paıdalanbasa, ol jol apaty kezinde óte qaýipti bolady, tek ózin ǵana emes janynda otyrǵan adamdardy da jaraqattaýy múmkin», - dep atap ótti ol polıtsııasy komıtetiniń tóraǵasy Berik Bısenqulov.
