Saýalnama: Ulybrıtanııanyń basty jaýy qaı el

ASTANA. KAZINFORM — More in Common saraptamalyq ortalyǵynyń zertteýine sáıkes, brıtandyqtar eldegi jáne álemdegi turaqsyzdyqty sezinedi. 

Olar 2025 jyldy «haotıkalyq» jáne «qaýipti» ýaqyt retinde qarastyrady. Zertteý Plımýttaǵy 2000 adam arasynda jáne fokýs-topta júrgizilgen saýalnamaǵa negizdelgen.
Olardyń kópshiligi Ulybrıtanııa óziniń halyqaralyq yqpalyn joǵalta bastady dep esepteıdi (saýalnamaǵa qatysqandardyń 40 paıyzy solaı dedi). Qytaı, olardyń oıynsha, kúsheıip keledi (67%). Sondaı-aq respondentter AQSh (50%) pen Reseıdiń (39%) halyqaralyq arenada kúsheıip kele jatqanyna senimdi.

Sonymen qatar respondentter Qytaı men Reseıdi óz Otanynyń jaýy dep sanaıdy.

Respondentterdiń 65 paıyzy Reseıdi Ulybrıtanııanyń jaýy dep atady, bul atalǵan elderdiń ishindegi eń joǵary kórsetkish. Odan keıingi orynda Iran (51%) men Qytaı (33%) tur.

Frantsııa Eýropadaǵy eń jaqyn odaqtas bolyp tanyldy. Zertteýshiler sáýir aıynan bastap AQSh-ty odaqtas sanaıtyndardyń úlesi 7 paıyzǵa ósip, 50 paıyzǵa jetkenin atap ótti.

Respondentterdiń jartysynan kóbi (54%) qaqtyǵysqa qatysýshy taraptar atysty toqtatýǵa kelisken jaǵdaıda brıtandyq áskerlerdiń Ýkraınadaǵy bitimgershilik mıssııasyna qatysýyn qalaıdy. Saýalnamaǵa qatysqandar Ulybrıtanııanyń Ýkraınaǵa qazir qalaı kómektesýi kerektigi jóninde ekige jaryldy. 24 paıyzy qarý-jaraq jetkizýdi, 17 paıyzy gýmanıtarlyq kómekti, 14 paıyzy Reseıge qarsy sanktsııalardy, 6 paıyzy ýkraındyq bosqyndardy qabyldaýdy qoldaǵan.
Respondentterdiń pikirinshe, Ulybrıtanııa úshin negizgi qaýipter kıbershabýyldar (24%), lańkestik (15%), ıadrolyq qaqtyǵys (14%), kádimgi áskerı qaqtyǵystar (12%) jáne «ásirese ońshyl» terrorızm (7%) bolyp tabylady.

Eske sala keteıik, Ulybrıtanııada jasóspirimder 16 jastan bastap daýys bere alady.